今日大年初一，謹代表暖流版所有曾逢絕路最後得到幫助嘅苦主、搞Project資源從冇到有嘅大大小小服務機構……向各位讀者拜年，祝各位豐衣足食，年年有餘，多咗嘅就捐畀蘋果基金，𠵱家咁嘅經濟環境，可以用嚟幫多啲弱勢社群。
送馬迎羊，今年踏入第八個年頭嘅蘋果基金一直都直接幫助Client（受惠個案），譬如：冇錢殮葬、冇錢開飯、冇錢交租、幾陷截水截電絕境等家庭。值得一提嘅係近年經濟轉差，我哋接到唔少失業、甚至走投無路破產嘅家庭求助，睇到有需要嘅人愈嚟愈多，我哋咪惟有多啲嚟密啲手囉。
沒有廣大讀者嘅支持，我哋幫唔到咁多人。除咗受惠個案，基金近年都撥款資助唔少服務計劃，好似一個收集家電物資轉贈「食綜援」人士嘅Project，受惠人次二千，基金一年開四次會，年終都資助幾十個Project，受惠人數以萬計，加埋基金每年搞唔少活動，一個「送暖行動」已有逾千人得到溫暖……
我哋要多謝嘅重有一班「隱形」嘅有心人。一個電話打嚟：「我想搞幾圍團年飯畀啲孤零零嘅老人，唔使出我個名！」試過我哋報道過有病童急需籌二十萬醫療費，有位善長同我講：「你聽日嚟我Office攞張Cheque，要用無名氏捐喎！」重有一隊車隊，多年嚟幫我哋免費運送讀者捐贈嘅二手家