羊年了！恭喜你，恭喜我，去年那麼艱難也度過！
祝各位靚姐：
想有幾瘦就幾瘦，瘦過條柴亦唔嬲，
皮膚滑到不留手，手到拿來乜都有，
有工做又有愛做，有愛情又有朋友，
有時間增值進修，冇時間擔心擔憂，
健康活潑兼樂觀，心肺功能夠正斗，
上司下屬易相處，工作不致大棘手，
就算棘也只一陣，不會棘得太長久，
又長又久的只有：份工同埋個拖友！
祝各位麻甩佬：
腳踏實地兼穩健，無風無浪度羊年，
沒有靚車不緊要，最緊要還有明天，
夠氣夠力也夠堅，凡事唔掂搞到掂，
手瓜未必會起𦟌，然而自信心依然。
能屈能伸方英雄，馬死落地好自然，
老朋友互相鼓勵，自我努力也自勉。
也祝君有美同眠，下面仍一柱擎天，
就算暫時不擎天，也不太軟不太扁！
祝各位高官：
讓市民喜氣洋洋，請你們辭職回鄉。
讓市民安心度日，請你們收埋衰樣。
讓雀鳥開心歌唱，請你們收聲收皮。
讓香港氣吐眉揚，請你們跳海中央。
換句話說，尊貴的，請你們撼頭埋牆！
至於我自己，羊年不敢奢望太多，只求健健康康，以及那個令我心癢難搔的靚師奶，可以開恩讓我止癢一次半次。
除此之外，羊年我希望識多幾隻字，寫東西寫得好一點，希望有天可以落羊紫桂。哎吔，乜唔係咁寫嘅咩?!