踏入羊年，各大政黨周身唔得閒，因為掛住二月九日嘅九龍城海心區補選，六個人爭一個位，真係打崩頭。民主黨嘅楊森話，呢個假期只會同屋企人去幾日澳門。做咗主席，森哥首要任務係到處拜訪，食完蛇宴食團年飯，佢話圍圍枱啲街坊都係最擔心冇嘢做；所以佢除咗祝《蘋果》讀者羊年喜氣洋洋，萬事勝意，又希望香港經濟復甦，大家有工開。民協嘅馮檢基亦都希望羊年打工仔有工做，有工做嘅都有糧出，做生意就生意興隆，老人家就身體健康，萬事如意。
工聯會嘅陳婉嫻一樣祝大家喺羊年人人有嘢做，佢希望啲香港人開心啲，樂觀啲，天跌落嚟當被冚。嫻姐又話過年會寫幾篇文章，要求政府小心處理珠三角融合嘅問題，特別係香港嘅定位，否則俾人融化咗，啲打工仔點算？
勞聯嘅李鳳英就祝大家新一年好過舊年，都係希望打工仔有工開。民建聯嘅葉國謙就睇得宏觀啲，佢希望世界和平、香港繁榮，當然最緊要係經濟好，咁大家心情會好啲。
傳真︰2623-9278
電郵︰