今日羊年年初一，謹祝各位新年順景、從心所願、四季平安、身壯力健、家庭和洽、公司興旺、老闆生意興隆、員工升職加薪、學生考試科科A、老師教學事事成。
善頌善禱之後，請大家謹記，二月四日年初四之後，羊來馬去，立春日八字顯示羊年不會曳過馬年，但做事必須努力，不能放鬆。
講到做事勤力，不能不佩服甘老闆。年廿六之時，肥佬L心血來潮，走到中環搵飯食，十二點幾先至話要去鏞記，點搵位呀？肥佬L大把計仔，不消三分鐘就搵到二樓靚位。我哋行經地下大廳，等𨋢之時，九十一歲嘅甘老闆響埋邊，向我哋揮手微笑。甘老闆創業六十年，至今逢星期一至六、每日上午都坐響度睇住，佢附近嘅五張枱，專係招呼多年熟客，識得甘生，同佢有傾有講嘅，過咗一點幾之後，熟客唔到，先至放番啲位出嚟畀其他人客坐。
肥佬L好佩服甘老闆嗰種敬業樂業嘅精神，而且夠專心，鏞記只在中環，不擴充，唔開分店，淨係做好本店嘅食物與服務，無怪一星期七日，地下、二三四樓，全部滿座，賺到笑，不知不景氣為何物。肥佬L做生意，以專心著稱，但近年亦分散精神，台灣香港兩邊走，冇以前咁專注咯，唔知佢食完幾件燒鵝、清湯牛腩、炆斑尾之後，搖頭擺腦之餘，會唔會拿自己與甘老闆經營方法比較呢？