蒙嘉慧（YoYo）早幾日因急性盲腸炎喺屋企暈咗，重撞傷下顎同後腦，結果縫咗十幾針。
馮仁昭噚日去醫院探蒙嘉慧，見到佢喺度瞓緊覺，好彩都冇破相，不過下顎就貼咗膠布。隨後佢重出咗院，趕返屋企同家人團年。
事後YoYo就話：「𠵱家身體好虛，重貧血㖭，因為之前做手術時，醫生唔贊成輸血，所以冇咗成千幾CC血。」
講到有消息指YoYo因為受傷，所以佢喺《陀槍師姐IV》裏面可能要減戲份，YoYo就話：「我梗係唔想啦，如果真係阻咗進度，我都冇辦法，我寧願之後開OT補戲喇。」
羅文上年因癌病逝世，噚日係佢嘅生忌，好友Terry去咗跑馬地羅文生前嘅寓所拜祭。Terry噚日下晝四點幾出現，逗留咗約五分鐘就離開。Terry話：「我都係嚟上炷香畀佢，佢啲徒弟噚日（即前日）都嚟晒。」而羅文生前嘅助手阿東雖然帶病，噚日仍然有去拜祭羅文。
粵劇名伶羅劍郎日前喺美國病逝，享年八十一歲，佢嘅家人日前喺華埠麗安殯儀館為佢設靈，前日出殯。香港藝人陳寶珠、李香琴同文千歲等雖然冇親自致祭，但佢哋都好有心送上花圈同打電話慰問羅劍郎嘅家人。羅劍郎太太話羅劍郎生前對家人好好，子孫都有去靈堂送佢一程。
洪天明噚日喺黃大仙出席「皆大歡喜賀新歲」活動，佢即場唱咗首歌，搞到現場啲師奶同小朋友好開心，重不時搵佢影相，天明話：「做騷通常都係咁，有啲小朋友喺度會開心啲。」
問洪天明新年點過，佢話：「今日我會返內地同老竇一齊去打高爾夫球，我哋打錢㗎，不過通常我都會輸，唔捨得贏佢。」
陳法蓉嘅愛犬上年俾另一隻狗咬傷，好彩佢即刻將愛犬送去獸醫度醫治，之後陳法蓉搵咗律師控告狗隻嘅主人，佢日前重入稟小額錢債審裁處，向該狗隻主人索償。
陳法蓉前日就話：「我覺得追番啲診金都已經好好，不過愛犬無辜受傷，我真係好心痛。」
