楊受成外甥邱子傑及太太李茂琪（Margaret）藉喜氣洋洋的農曆新年，與今天滿三歲的兒子聖橋（Julian）及僅四個月大的女兒聖華（Jessie），一家四口穿上賀年服裝，合力製出以一百零八隻綿羊為主題的應節親子賀年畫，取其諧音「一定發」，Margaret表示會將作品放於家中作為新年布置，添新年氣氛。
Margaret說：「我同老公都認同過農曆年一定要好意頭，所以幅畫以紅色做底色，加上今年係羊年，我就以一百零八隻綿羊，加上諧音似『一定發』，特別有意頭，我特登買咗個模，可以畀囝囝同囡囡印上白色綿羊仔，然後我再加眼睛。」Margaret續說：「𠵱家過新年會依奶奶嘅習俗，例如將一對桔擺喺枕頭邊。自從有咗小朋友之後，我哋每年都一定着新年服影相留念，之後會去團拜，令小朋友感染新年嘅氣氛，而且今年年初一更加有意義，因為二月一日（即今天）就係Julian正日生日。」
此外，Margaret表示重拾畫筆有不少樂趣，她說：「我𠵱家暫時停止公關嘅工作，專心照顧Julian同Jessie，重有番時間畫畫，我多數會以家人為畫畫題材。Julian成日睇住我畫畫，佢都培養到有畫畫嘅興趣，我真係好享受呢種生活。」她更表示新一年的願望是可以開個人畫展。
採訪：RitaLeung
攝影：RickyChan
