郭晉安馬年年尾憑劇集《戇夫成龍》「阿旺」一角而一飛沖天，「楊老師」楊婉儀則事業愛情皆得意。二人日前齊齊買年花，阿旺揀了價值二十八元的富貴竹，祝人人富貴、「旺」到發紫！
郭晉安憑《戇夫成龍》劇中扮演「丁常旺」一角而深入民心，他趁着農曆新年，日前與《戇》劇中飾「楊老師」的楊婉儀買年花，更捧着價值二十八元的富貴竹，祝大家「易發富貴」，他們又一齊舞起迷你醒獅，祝大家龍精虎猛。
日前阿旺和楊老師在灣仔選購賀年花，阿旺經過一輪精心挑選後，終選了一盆富貴竹，希望人人富貴，他更將富貴竹送給楊老師，他笑說：「有我阿旺買畀你，你實旺呀！」逗得楊老師哈哈大笑。
當日阿旺不停被fans要求合照和握手，事後他笑說：「𠵱家我行街有好多人摸我呀，啲人話唔摸都握吓手，佢哋覺得我有旺氣，我就好似車公廟咁。我又見到好多人啲衫都有個旺字，又有好多揮春寫周年旺相之類，其實我希望可以盡量帶歡樂畀大家。」
至於新年願望，阿旺說：「我祝大家『羊羊』自得、自由自在、從心所欲、旺到發紫、鴻運當旺，重有世界和平，唔好打仗，唔好踏入羊年美國就出兵，我希望經濟好，人人有工開，呢樣最實際啦。」
而楊老師因在新年期間要拍《生命天使》及《律政新人王》兩劇，故她已提前跟家人及準夫婿王瑞勳食團年飯，但她工作排得密麻麻，豈非沒時間處理四月舉行的婚禮？楊老師笑說：「我未揀婚紗，又未買戒指，但船到橋頭自然直，我可以證明畀大家睇，𠵱家嘅女人係可以事業愛情一齊兼顧。」
採訪：朱芷瑩 攝影：陳慧安
服裝提供：DKNY
場地提供：永安文具中心、麗沁園藝
