今日係大年初一，首先謹代表《車天車地》版仝人，恭祝大家路路暢通；為使大家響今年凡事能順順利利，所以今日特別介紹一啲有關新一年汽車運程嘅應運方法，更會講出車主要避忌嘅事，係啱嘅朋友就要留意喇！
記者、部份攝影：黃凱穎
ImageGirl：豆豆
據資深玄學家方海閱表示，今年係六白乾金入中，係有利金色、銀色、銀白色同銀灰色，所以車主想要趨吉避凶的話，可放置上述顏色嘅飾物在車上作吉祥物之用。六白乾金入中，如果能與有利嘅顏色配合，便有助增加財運、事業同人際關係，而對於一啲做生意或娛樂事業嘅人嚟講，可借六白乾金入中來提升自己嘅名望。而響眾多吉祥物之中，金色或銀色嘅葫蘆會係最佳嘅吉祥物，因為葫蘆本身能夠化病和收煞，除能夠化解車主喺羊年駕車時嘅煞氣外，如果能夠以金或銀色配合，更能有名利雙收嘅效果。
在道家角度嚟睇，羊年會不利紅色同藍色車身嘅汽車，紅色係火剋金，而藍色則會洩氣，即代表有意外和破財，車主可將三粒金色同三粒銀色嘅紙摺幸運星，放響車廂內，因為星代表光芒萬丈，而金銀色則能配合六合乾金入中，再以「六」數字嘅配合，便能化解車身顏色帶來嘅不利。
方師傅表示，行大運有上山下海之意，汽車固然不能下海，所以便可以簡單嘅洗車，作為行大運嘅其中一環；行大運嘅洗車方法好簡單，只需將碌柚（取其諧音祿有）整個放在水內浸15分鐘(水為財，有載着金錢嘅意思），再用呢啲水簡單抹響車身上和車廂內，便能有下海之意。
有好多車主都鍾意喺農曆新年揸車行大運，取其意頭吉利；方海閱表示，行大運的確可帶來吉祥，他並舉出行大運嘅地點和方法。車主行大運時，可到大帽山、太平山和飛鵝山，因為呢三個山脈最權威同有靈氣，而登山可避災避劫，同時亦有行運之意；而當車主駕車到山上時，可以落車向不同方向作三拜，以求得該方向貴神嘅靈氣，其中西北方係迎接喜神（即有喜事）、正北方為貴神（即有貴人相助）、東南方係財神（即財運）。而行大運嘅吉利時間，係大年初一凌晨一時至上午七時，同埋下午三時至晚上七時。
據玄學師傅麥玲玲表示，車牌嘅好壞不在於有幾多個數字，而係整個車牌嘅卦數，若車牌號碼能與八字及本身命理配合，就能夠得到最佳效果；不過，你亦可嘗試用簡單嘅方法，去計算及解釋車牌嘅組合及數字嘅配合。