在春回大地的日子裏，有這麼一位從人生高峯墮下的小婦人，抹去一臉塵土，嚷着新年會更好。她曾經不加思索就一擲萬元買一件皮草做闊太，然後落泊到每小時只收五十元做鐘點女傭。這位小婦人的新年願望，是新開張的靚湯外賣生意愈賺愈多，然後邀請教人煲湯創業的財政司司長梁錦松，給她的未來新店子剪綵和喝采。 記者：蔡元貴
她叫阿Ann，每天早上十一時出發，拖着載滿二十壺熱湯的手推車穿街過市，先去香港電台，再去又一城、廣播道、浸會大學、科技大學。Ann自幼就是嬌生慣養的千金小姐，雙手本來滑得吹彈得破，如今手掌都因為天天拖着手推車而變得又厚又腫。
Ann和丈夫張先生都是成衣業出身，張先生本來在港設廠。八十年代末期，工業大量北移，張先生面對大陸廠商的競爭，生意江河日下，適逢一位外資廠商在上海設廠，游說張先生北上替他打理業務，張先生毅然接受，與Ann一同北上打天下。
那是羨煞旁人的風光歲月，他們有三個工人，一個負責湊仔，一個煮飯，一個打掃，出入有司機，「我哋兩夫婦食公司嘅、住公司嘅，每月幾萬蚊收入全部淨袋，着皮草，一套衫過萬……」
直至九六年，張先生眼見香港形勢大好，碰巧兒子年屆求學之齡，加上上海工業發展一度回落，張先生遂毅然返回香港。夫婦兩人於九六年回港後賣掉樓盤，套現二百萬元，然後在樓市顛峯期買下青衣豪景花園，每呎五千元，「初頭炒股票炒得好順利，真係坐喺度識㩒掣就賺到錢，但係到咗九七年尾，股票炒燶咗，冇咗三百幾萬。樓價又開始跌，最後我哋將樓盤放埋。」張先生的收入每下愈況，Ann不得不努力掙錢幫補家計。
由八百呎的青衣高級住宅搬到三百呎的荔景邨公屋，Ann踏入了人生的轉捩點。她要在深淵中爬起身，Ann先後學過英語、中文電腦、穴位按摩、家務助理等課程。其間她找過工，失過業，做過鐘點女傭，「夏天間屋成攝氏三十八度，熱到生熱痱，嘴都腫埋，我對潔廁劑又敏感……點解以前咁風光，𠵱家要洗廁所？有時返到屋企會一個人喊，我唔敢畀老公知。」
至去年任職鐘點女傭其間，不少僱主都問她會否煲湯，Ann發覺外賣靚湯需求殷切，剛巧任職大廚的表哥失業，又記得阿松鼓勵市民煲湯創業，於是就與表哥及一名友人合資成立了「清心湯」，外賣靚湯。創業三個多月後的今天，「𠵱家我哋每日出到二百壺，希望生意愈做愈好。我好希望今年之內可以開到間地舖，到時我哋一定會邀請阿松嚟剪綵。」
驀然回首，Ann發現自己的人生路雖然崎嶇，卻愈走愈快樂，「好多人慘過我，我只不過係冇錢，冇錢咪慳啲使囉。只要你肯做，香港地餓唔死人嘅。」Ann沒有怨天尤人，「生命係自己選擇嘅，唔係人哋揸槍指住你炒股票炒樓。我冇覺得我失去咗啲乜，錢之嘛，冇咗可以搵番。由管理階層變咗做勞動階層，絕對冇壞咯！我同老公患難中感情更加好，我𠵱家活得更開心，更加快樂。」