章小蕙（Teresa）準備羊年大展拳腳，新正頭她親自駐守在崇光新設的化妝專櫃，晚上則埋首執拾新居，脫離與二百多個紙皮盒同住的日子。
早前Teresa穿上價值六萬多元的ChristianDior燈籠袖大褸，用自家品牌LindaCantello化個靚妝出動，一個下午行勻灣仔、銅鑼灣和旺角辦年貨、買年花。
Teresa說：「我係好傳統嘅中國人，做足傳統過年預備工夫，辦年貨、買全盒同埋封利是。我鍾意去啲老字號、好地道嘅舖頭，感受一吓嗰份舊香港嘅家庭式風味。」至於年花，可惜Teresa的心水茶花缺貨，不過一棵巨型牡丹王卻令她目不轉睛。
Teresa第一站往灣仔已有數十年歷史的「香港印刷月曆」訂購利是封，未入門就遇上許晉亨堂嫂、許晉平太太莊慧敏（Vivian）。Vivian鬼馬地問章小蕙：「你買乜嘢姓氏先？」兩人相擁而笑。
Teresa開心大笑說：「Vivian係我舖頭客人，好熟㗎，而呢度老闆娘係潮州人，好好人，知道我年年都好遲先嚟買利是封，每年會幫我印定幾盒『章』字利是封。」
Vivian則說：「我好鍾意一種好精緻嘅細紅色利是封，上面印咗一百個金色福字。今年有長輩返咗嚟，所以要特別幫佢哋訂埋姓氏利是。」Teresa和Vivian又不約而同看中一款金底彩色牡丹加上姓氏的利是封。Teresa更買了十一盒利是封包括三大三小牡丹封、兩盒章字封和三盒百福封，她又透露每封利是由二十元至五百元不等，支出約數千元。
Teresa到蔡瀾推介的「華麗園」買年糕，由於店外大排長龍，章小蕙亦要排隊。Teresa選最glamour的玫瑰金箔年糕，每盒價值二百二十元，而傳統的黃糖椰汁糕亦是她的心頭好。
Teresa所到之處均受到熱情款待，第三站她到「么鳳」買糖果、牛肉乾，有折扣更獲贈朱古力金幣。她試食蜜瓜軟糖後，又買了八包牛肉乾，Teresa如數家珍說：「辣蝦乾、果汁牛肉乾係我寫稿嘅恩物，𠵱家香港好少港式老舖做得咁好味。而芋蝦、芋片係我由細食到大，有感情，呢度勝在無鹽。糖冬瓜、糖蓮子就整蓮子八寶茶。新年興剝瓜子，不過我就冇咁嘅耐性嘞。」
最後一站，Teresa趕到旺角花墟相熟的花店買年花，途中見有小販賣煨番薯，她二話不說就買了十元煨番薯，邊行邊食。她說：「我時裝店年年都擺桃花，屋企就鍾意擺茶花，一買就買四盆，因為好lady、好矜貴，啲花係水粉紅、胭脂色，又可以畀細路仔寫生。」可惜Teresa最後找不到茶花，反而一棵巨型牡丹王吸引了她的目光，她說：「我office枱頭都有一盆牡丹，好嬌小動人㗎。」
採訪：DebbieLum 攝影：JerryYan 髮型：SumPoonofChin.G.
