羊年就到，但呢隻羊有火。小布殊誓要鏟除侯賽因，香港傳媒都準備就緒，以防一觸即發嘅大戰打亂陣腳。
雖然未開火，但兩大電視台日日企喺巴格達報道，好似打到嚟咁。八方問有線電視主管趙應春，班手足幾時返嚟？佢話睇怕都要喺伊拉克過年，下星期先至班師回朝。講開今次申請去伊拉克，有線係向伊拉克駐北京大使館遞表格，聽講有唔少蝦碌嘢。
首先，大使見到Cable一字，重以為係間互聯網公司，後來先知係電視台。其次，就係Cable本來交咗張八人名單，前面係編輯記者名，攝影師同工程人員就排喺後面，點知大使館一個唔該，淨係批咗頭四人入境，搞到馮德雄同高劍青佢哋要漏夜惡補拍片同傳片。
無綫就好彩好多，兩個女高層同一個攝影師成功入伊，謝彩雲同譚衛兒噚日喺中國駐巴格達大使館預祝新歲，重唱埋歌㖭。
佢哋嘅老頂羅燦話，呢幾日一有飛機位，採訪隊就會返嚟先。
其實去中東採訪，真係花費好大，亞視有高層就同八方講，佢哋「邊有無記同有記咁有錢吖！」乜唔係話陳永棋照住咩？至於佢哋啲片，係早前鳳凰衛視去採訪時拍嘅。不過，有人就笑話啲片怕且都拍咗一段時間，因為啲人着夏天衫，𠵱家巴格達已經好凍。
（圖）無綫嘅謝彩雲同譚衛兒𠵱家仍身在巴格達，但呢幾日都等緊機位，準備返香港。電視圖片
傳真︰2623-9278
電郵︰