日本噚日先有得賣嘅CAPCOMPS2重頭大作《DEVILMAYCRY2》，香港就比日本幸福得多，由於代理關係行貨一早喺上星期尾派咗落場，所以好多人都唔使忙撲Game過年玩，好多舖頭都表示如果冇《DMC2》，1月份都唔知點算，隻Game現市價約$420-$440左右，未買好快啲買隻過年。
另外，街機大熱嘅頭文字D賽車，PS2版《頭文字DSPECIALSTAGE》本來會喺3月尾推出，現代理證實會延期至6月27日，要喺屋企鍊車又要等一下。
Konami1月30日喺GC上推出嘅《WE6FE》，由於之前PS2一早出咗，所以好多舖頭都唔敢落單，而代理入貨都輕手咗，據聞全批貨都係得幾百隻，相信價錢都會企得幾硬淨，𠵱家市價約$380-$420左右。
之前日本版炒到㷫烚烚嘅《DOA排球》，喺呢幾日會推出行貨版，據零售商表示今次隨行貨附送嘅特典由於係按比例分配，相信會同日本版特典一樣難以取得，所以有興趣嘅好留意一下。
好多人都遺忘咗嘅WonderSwan仍然有Game出，今次主角係老動畫迷一定識嘅筋肉人，隻Game初回會送小型Figure一個，市價約售$270。