巴塞隆拿冇咗教練雲高爾後，真係處於非常時期，暫代教練歷斯治只係過渡人物，下屆邊個接任都肯定同巴塞大掃除。
據報二十年前教過巴塞嗰個阿根廷名教練文諾迪，已經坐緊飛機去巴塞，睇嚟好有機會成為魯營球場總舵手，我求大俠相信佢如果坐正，啲荷蘭兵就好謀定後路。
如果雲高爾以荷蘭人身份重用同胞呢個理論成立嘅話；文諾迪重用阿根廷人就冇乜唔妥，所以可以大膽推斷，文諾迪若執教，列基美可重見天日，沙維奧拿及門將保蘭奴可重拾信心。
但係我求大俠諗，雲高爾餘黨一日唔除，文諾迪都有排搞。
於是後防大患荷蘭嘅法蘭迪保亞，以及列斯加將好有機會離隊，而奧華馬斯重新打入冷宮，甚至同巴西中場洛咸碧克都係咁先，接上嘅係一啲「土炮」例如文迪達同丹尼，以及法國後衞基斯坦華。
講開文迪達，佢果然喺雲高爾離開後生猛咗，日前友賽更一箭定江山，以一比○勝主隊葡萄牙賓菲加，巴塞有咁好嘅重新開始，難怪得我哋榜首名家青蛙仔一早就講，禮拜六捧巴塞反底，作客力挫馬體會！
如果我求大俠話大前日車路士反勝列斯場波，係林柏特「科騷」，我諗反對聲音一定唔多。不過據講入場睇波嘅英格蘭領隊艾歷臣提早十五分鐘離場，睇唔到林柏特最後階段嘅精采演出。《太陽報》（我指英國嗰份）夠醒，將佢最後十五分鐘比賽過程輯成錄影帶寄比艾歷臣，表面就話撐林柏特，實際就盡收宣傳之效，認真高招。
據愛華頓新貴朗尼嘅友人爆料，朗尼最近走去考牌，一心諗住考完牌買車過吓飛車癮啦，點知連筆試都肥佬，衰到要重考兼俾啲老友笑。據我求大俠所知，所謂筆試只係問一啲簡單駕駛理論，重係選擇題㖭。小朋友想實現理想，咪連背吓書都懶至得㗎。
睇咁多年波，以前聽唔少蘇聯佬外流搵食事例，但無乜聽過其他國家球員調轉頭走去發展。曾經踢過國際米蘭，𠵱家教緊俄羅斯伊利斯達嘅前國腳沙林莫夫，近日就創造歷史，透過佢同意大利球壇嘅關係借到基爾禾中場柏斯桑尼同埋維琴察後衞迪簡度，我估邀兩意國兵到彼邦發展都係噱頭多於實際。
噚日網隊兩名新星馬田同謝菲遜合力把米高佐敦盯死，搞到佢老人家全場只攞得可憐嘅八分。賽後馬田意氣風發咁話呢場波係要證明佢應該入選明星賽，謝菲遜雖然冇公開表態，不過好明顯，佢哋無非要將落選明星賽嘅不滿發洩喺波神身上，同時利用波神嚟證明自己嘅實力畀啲唔選佢哋入隊嘅東岸教練睇。