正忙於掃除公司紙碎垃圾之際，門鈴忽響，竟然有不速之客登門造訪，話係統計處派嚟做公司職位空缺調查嘅。有冇搞錯呀，我哋公司細細，但每季嘅調查，我哋「中獎」幾次，又咁好運嘅，六合彩唔見我哋中，呢類事就經常被抽中，唔係幾信得過，都唔知係唔係答覆過一次之後，就俾統計處mark（嘜）住，以為我哋係容易訪問嘅對象。
不過既然係統計處嘅「二○○二年第四季僱傭及職位空缺按季統計調查」，點都要應酬吓，事實上，只有一個答案，就係本公司冇空缺！風大雨大之時，邊度敢開位請人呀！
打發調查員之後，收到餐廳羅傳真嚟一紙「應付直銷妙法」。此法來自互聯網，一位三藩市仁兄話：「收到直銷電話，唔使話No，只係講三個字，就係Holdon,please（請等等），跟着就行開做番自己做開嘅嘢，對方最注重時間，時間就係金錢，唔可以等你咁耐嘅，不消一刻，電話就會beep聲，即係佢收咗線，掂晒！對付一啲垃圾郵件，甚麼預先批核信用卡之類，最好用附帶嘅回郵信封寄番轉頭，等銀行職員收信拆信做餐懵，增加佢哋嘅成本；公用公司寄嚟帳單，亦不時附帶推銷信，最好寄支票付款之時，亦將啲推銷信寄返去，等公用公司同你掉垃圾！」呢啲橋真過癮，美國人一年到晚收junkmail無數，收到煩，所以諗到如此絕招。大家不妨偷吓師！