今日係年廿九，相信唔少人都同我一樣，與家人食完團年飯後便往年宵市場行個大運，今年大家可以選擇去深圳的年宵市場。深圳的朋友都推介我去愛國路呢個羅湖區最大的年宵花市，內裏更有近八百個攤位，前幾日我逛過一次，當時已人山人海，相信今晚的氣氛更加熱鬧。
記者：黃希知、歐嘉荃
攝影：陳星
ImageGirl：Cathy
我行過數十個桃花攤檔後，發現好多桃花都差唔多開晒，「今年天氣比較暖，啲桃花早咗開，所以價錢都比往年平，好似一棵四呎嘅都只係賣?120至?130左右，如果係舊年可以賣貴幾十蚊。」檔口老闆何生表示。
售價：?60至?200（檔號D047）
我最鍾意就係呢啲造型Cutie嘅仙人掌，將兩棵平平無奇嘅仙人掌打扮到鬼五馬六，有晒眼、耳、口、鼻，五顏六色，用嚟做枱頭擺設夠晒鬼馬。
售價：?30（檔號C044）
要數全場最激嘅造型，非呢隻羊莫屬，佢有半個人咁高，用了八百個五代同堂，花四至五日時間以人手砌成。講真，睇就好得意，但要搬走都好難，所以老闆話始終睇嘅人多，買嘅人少！
售價：?3,880（檔號D056）
呢款廣州嚟嘅雞冠花，雖然無香味，但勝在樣靚，而價錢就因應唔同大細而定，但可惜只得一種顏色，選擇比較少！
售價：?3至?10（檔號B035）
地址：深圳羅湖區愛國路
開放時間：8:00am-12:00midnight
門票：免費
交通：由羅湖關口搭的士前往約需?18
講到特別，我最鍾意呢幾個流動小販所賣嘅葫蘆絲樂器，呢款樂器是雲南少數民族的樂器，全個用人手製成，雖然唔算精美，但?85都可以諗諗。
見到兩位小朋友拎住個邊轉邊響的風車，即刻走去睇睇。原來當風車轉動時，會敲動風車背後的小鼓仔，所以會發出咚咚聲。老闆徐先生說：「這些風車全由人手製造，售價定得平啲，希望多啲人買啦！」
在眾多檔口中，我最鍾意呢檔羊咩咩，造型維肖維妙，來自河南的負責人李先生話：「全隻羊都係由人手做，羊毛其實是纖維做成。不過最大那隻羊的價錢比較貴，因為內裏以塑膠製成，工序較複雜，價錢賣成?1,800。」
呢度可以?5買到一張以人手寫的揮春，在旁欣賞時，只見他雙手不停地寫，即席揮毫的筆法的確令我歎為觀止，想問老闆的來歷，他仍舊專心寫他的揮春，只答：「揮春?5，對聯?30。」收到，我都無謂騷擾老闆的雅興。