馬年最後1個交易日，港股升18點，收報9258，成交55.13億元。市場基本預咗美伊開戰，所以在過年前要減磅的，應已完成減磅行動。
比亞迪（1211）經過連番拋售後已告喘定，而最值得留意的是比亞迪H股主要基金股東之一TheCapitalGroup申報在比亞迪急挫期間曾入市吸納，令其持股量升至15.4%，而另一主要基金股東富達則尚未有任何申報。換言之，此兩大台柱仍對比亞迪不離不棄，亦即是說比亞迪要重整攻勢絕對唔難。
東方電機（1072）經過上周請傳媒及證券界北上吹風後，一周累積升幅達25.8%，表現算係有所交代，不過由於股價突破1元，噚日收報1.12元，小心莊家隨時會出貨獲利。其實今次東方電機只係想話畀大家知，公司會扭虧為盈，唔會被罰除牌，冇咩特別新意，加上成交冇顯著增加，見唔到有基金盤增持，升勢實難以持續。反而預期盈利將大升50%的馬鋼（323）依然冇咩上落，收報0.68元，但成交就幾大，有成1163萬元。黑客話早前有投資者於0.6元以下入市，但由於大市後市不明朗，所以噚日獲利回吐壓力都頗大，相信要到春節後先至會有睇頭。
長發建業（172）股權易手後，股價急升逾倍，噚日至略為回吐6.45%，收報0.029元。早前公司話大股東以每股0.045元售23.38%予黃如龍等人，股權易手已告完成，高層亦已進行大換班。
睇真啲新董事會成員中，竟然有一位中國保利集團公司之資深董事，及中國廣州保利投資公司之創辦人及主席藍寧。今後長發與保利集團關係如何發展，值得留意。
阿虎