今日起就放長假期，小初收市後同經紀傾，估吓有邊隻股有機會做羊年之星，經紀陳就覺得，保昌控股（562）有機會跑出。
做物流的保昌上市多年，雖然盤數多年來相當穩陣，業績又OK，但一直在金融界默默無聞，但早排佢公布收購怡和的物流業務怡和物流，變相引入怡和做主要股東，即刻聲名大噪。
噚日係保昌完成收購怡和物流，股價即升10.64％，收2.60元，接近1年高位2.625元，但成交就重好細，只得360萬銀。
另外，有間歐資證券行亦在噚日出報告，話隻股開始啟航。間歐資行話，雖然怡和物流家陣唔賺錢，但合併就可令保昌的業務規模大增1倍，加上保昌又北望神州，所以有機會在兩年內大發圍，同埋家陣公司錢多，亦有機會派特別股息，所以家陣上車並唔係遲喎。
經紀陳話，時興物流，勝獅（716）已炒到㷫烚烚，所以封保昌做明日之星不為過。
慕容小初