郭富城日前同一個着比堅尼嘅靚女模特兒，一齊為舒適堡拍攝新一輯名為「春之魅力」嘅平面廣告，佢喺鞍馬上大擺拗腰甫士，驟眼睇埋去，以為城城選緊健美先生㖭！
只見城城着緊身上衣配短褲，喺鞍馬做咗唔少高難度動作，盡騷全身肌肉。城城呢次嘅造型，廣告商邀請咗時裝設計師WalterMa幫佢設計，WalterMa重大讚城城身形好弗。
廣告商話會用約五百萬為城城做宣傳，並配合一句「活出自我新型態」嘅口號。呢排城城咁鬼博，又拍內地劇，睇嚟佢都係想收復上年嘅失地啫！
蒙嘉慧（YoYo）日前因急性盲腸炎喺屋企暈咗，撞傷下顎同後腦送院，下顎縫咗十一針，後腦就縫咗三針，YoYo噚日話：「好彩下顎個十一針唔係好明顯咋！」
YoYo經理人就話：「YoYo嘅手術都好順利，𠵱家瞓咗覺，至於幾時出院都重未知，不過朝早醫生睇過都話滿意，目前YoYo手頭上嘅工作都要暫停，無綫方面都叫佢好好休息吓。」
關之琳同埋男友黃家諾，重有何琍琍噚日不約而同喺中環名店Joyce買嘢，黃家諾同之之買完嘢上車嗰陣，好有紳士風度咁幫之之開門。而何琍琍原來啱啱喺泰國返港，佢話：「我啱啱落機，遲又會去上海做。」
羅文前助手阿東噚日同張徹太太及一班友人，去咗籮記屋企食團年飯，阿東話：「我會整響螺雞湯，張太就煮齋同埋肥豬肉，呢啲都係籮記生前鍾意食嘅嘢。
「聽日（即今日）係籮記嘅舊曆生忌，我頭先上香時同籮記講，話今年過年佢唔喺度，好掛住佢，講到我眼濕濕，以前籮記年年新年都會畀封大利是我。」
陳慶祥（阿牛）噚日接受商台節目《樂人谷》訪問，佢話日前推出咗第一張廣東專輯，其中翻唱咗鄭秀文嘅《感情線上》，佢話呢隻歌好難唱，至於成隻碟入面嘅相，就由佢同佢老婆親自操刀。阿牛話農曆年會同老婆及囡囡喺台灣過，至於利是就未準備好，佢話舊年只係派咗千幾蚊港幣利是，當佢聽到香港人閒閒哋都封二十蚊利是，即刻嚇咗一跳，重問點解封咁多喎！
夏韶聲噚日喺銅鑼灣舉行演唱會DVD簽名會，有幾十個fans捧場，重清一色係男fans。夏韶聲話呢隻碟佢籌備咗兩年，單係投資都要成四十幾萬，問佢𠵱家市道咁差，點解重肯投資？夏韶聲話：「幾十蚊隻碟唔會冇人買，唔似𠵱家有啲人做到要老竇買番自己隻碟囉！」
