今日年廿九，趙飛雲先同各位拜個早年，祝大家龍精虎猛，逢炒必賺。講番個市，美股前晚低開高收，杜指早段跌過171點，幸好有力拗腰，結果倒升21點，收8110；納指彈力重強啲，收1358，升幅近1.2%。
港股昨日場外期指結算，早段市況反覆。開市冇耐，期指喺一兩分鐘內被插低逾百點，現貨亦跟住跌，好彩有人頂住，逐步收復失地，恒指最後升18點，收報9258。
經過近期急跌，無論是歐美股市還是港股，均呈超賣，故此趙飛雲昨日提出「形勢雖淡，不宜追沽」。從技術走勢分析，杜指和恒指均呈現「長尾鎚」，相信短線反彈未完，農曆年假期間外圍市況若非太差，估計港股年初四紅盤高收嘅機會較大。
雖然如此，趙飛雲對呢次反彈未敢寄予厚望，估計恒指唔易重返9400之上企穩，故此唔會買入正股或Call輪博反彈，反而會因應市況變化，吼位買恒指Put輪9587，再做過淡友。至於早兩日沽出嘅另一隻恒指Put輪9556，則暫時唔打算補番，因為隻輪3月28日到期，踏入2月，溢價會縮得更快。
另一件可以吼位上車嘅，係滙豐Put輪9588。滙豐（005）本周確認跌破頭肩頂頸線（84.75元）後，跌勢加速，走勢十分肉酸，頗有機會再試去年10月低位78元。大笨象昨日平收82.25元，9RSI仍處15.6低位，過份超賣，短線反彈唔奇，但估計好難升越84元，若見滙豐反彈近此位，9588即可上車。
趙飛雲