馬年股市草草收爐，恒指升18點。交投金額大而升幅勁嘅輪，有長實Call輪9680，由61仙彈上76仙，升幅25%，龍虎榜排第2，唔係乾炒，有10球易手，長實（001）收51元，升50仙，照計隻輪升足都應該只係升5仙，𠵱家升夠15仙，可以話升突晒。
9680係新輪，上星期五先至出爐，所以暫時輪價變化，未必作得準，唔一定按比例跟正股走。隻輪兩星期前由里昂賣出嚟，發行價83仙，一掛牌遇着個市散散哋，隻輪潛水得好厲害，前日最低56仙，第一批捧場客帳面輸得好勁，都要做番少少好戲。隻輪7月到期，溢價9%，槓桿率6.7倍，數據算係咁。留意喺正股調整時吸納，有錢搵時即套現散水。
升得比9680更大嘅係長實另一隻Call輪9517，前日3仙，昨日3.9仙，單日升幅30%，得20萬份易手，金額7張金牛。隻輪2月24日到期，尚餘交易日唔夠3周，溢價6.6%，槓桿率131倍。行使價54元，正股做緊51元，隻輪好大機會冇得剩。
下周二初四假後復市，將踏入2月，2月夠鐘嘅窩輪，變成「今個月夠鐘」，3月夠鐘嘅窩輪變成「下月夠鐘」。2至3月夠鐘嘅窩輪，如果太價外，風險一定好大，咪手多。
章盛