每到農曆新年，唔少家庭晚間都會有節日聚會，期間難免會飲些少酒，酒後駕駛固然會觸犯香港交通法例外，但如果飲得太多，就算你當晚唔揸車，到第二日起身駕車去拜年，都可能仍然受到酒精影響而感到頭痛，並難以集中精神駕駛，實在對自己、乘客及其他道路使用者嘅安全構成威脅。有見及此，今日我哋就教大家一啲醒酒提神嘅方法，另外又會提醒大家邊幾類藥物，服食後不能駕駛等等，務求令大家可在農曆新年期間，能夠安心地駕車出外拜年。
記者、攝影：黃凱穎
ImageGirl：Margreat
酒後駕駛會違犯香港交通法例，相信大家都知道；不過酒醒後，好多人都會出現頭痛或精神難以集中等現象，而呢類情況會影響駕駛者嘅直接反應，容易會因此釀成意外，故此如果要減低酒醒後嘅副作用，喺飲酒前就應有一定嘅準備。香港特區中醫院嘅黃子瑜醫師指出，飲酒前或飲酒時都可以配合一啲花類嘅中藥，去減低酒精對身體嘅刺激；但此舉最多只能解去一半嘅酒精，而且重要視乎所飲嘅份量而定。
黃醫師又話，最簡單嘅方法就係響飲酒前，先飲一啲花旗蔘茶或葛花茶，呢類茶能有助解去部份酒精外，亦能大大減低酒醒後嘅副作用；另外飲酒後亦可用桑椹子同葛根煲水，呢兩種中藥嘅解酒能力比花旗蔘茶或葛花茶重要高，但方便程度卻較低。另外，如果睡前出現頭痛難以入睡的話亦可加入酸棗仁，因酸棗仁有安眠作用，從而令你「有覺好瞓」。
飲酒時食生果都係非常好嘅解酒方法，其中柿子、西瓜、柚子同香焦最能解酒；但食生果解酒只能於飲酒時適用，酒後食用可以話無乜幫助。相反，籮蔔、綠豆、扁豆、竹筍同蜂密就可在酒後食用，作用亦能解酒同減輕血入面嘅酒精濃度，若果第二日起床仍有頭痛等酒後副作用的話，呢啲都係最佳嘅醒酒食物。
若果要駕車時提起精神，不妨在車廂中放置一個中藥香包；呢種含有艾葉、木香、檀香及九菖蒲嘅香包，經已有好耐歷史，古時多數將香包放喺小朋友身上，有僻邪同提神功能。其實檀香同木香有鎮定安神功能，而艾葉則可消毒，九菖蒲亦有助集中精神，所以響車上放置一個香包，揸起車上嚟人都會精神啲㗎！
各位車主駕車出外拜年，亦要留意自己會否對某些中藥敏感，當中最多人中招嘅會係白果，因為白果本身有微毒，敏感人士會有嘔吐、腹痛、發熱等現象，而對於一啲未處理好嘅白果食物，食後可能會有昏迷、恐懼，甚至係驚叫等現象。黃醫師指出，有部份人食完白果糖水之後，駕駛時會有不能集中精神嘅情況，甚至係肌肉抽蓄，而直接影響到駕駛車嘅駕駛動作㖭！
除此之外，中藥中嘅洋金花同烏頭毒類（附子、天雄、川烏、草烏、烏頭）都會直接影響駕駛者嘅精神及情緒，故此駕車前亦不能服用呢類中藥。
有好多車主喺放假期間，都會準備定一啲藥物以備不時之需，但其實好多藥物都會影響到駕駛者駕車時嘅反應；家庭醫生關嘉美指出，會影響駕駛嘅藥物有好多，包括抗敏藥、止嘔藥、止痛藥、安眠藥、抗抑鬱藥、降膽固醇藥、胃潰瘍藥、糖尿病藥、焦躁症藥、高血壓藥及軟性藥品等等，呢幾類藥物會影響駕駛者嘅視覺，而且重會令人有昏昏欲睡嘅感覺，因而令駕駛者反應變慢。關醫生又表示，一般嚟講服食藥物最少半日後待藥氣散去才可駕車，但安眠藥藥力較強，服食後12小時都不適宜駕駛。
關醫生話飲酒前最緊要飽肚，因為飽肚後飲酒可以令腸胃減慢吸收酒精速度，飲用大量清水亦能沖淡身體內嘅酒精濃度，而飲酒後或第二日睡醒後，可飲一啲清茶以助解酒；但若果飲得太多酒的話，就算第二日醒來都唔可以駕駛。
關醫生話好多人會以為駕駛時不能集中精神，可以食一口煙提神，但食煙只能令你有「High一High」嘅感覺，故此只係治標不治本嘅方法，而且對解酒更係全無作用；若響迫不得已時要駕車的話，可飲用大量濃茶、咖啡或大量凍水，此舉能有助提起精神。而市面上有售嘅解酒藥品，關醫生表示雖然唔太清呢類藥物嘅功效同原理，但可以肯定呢類藥物不能去除酒精對身體嘅影響，就算響酒後服食呢類藥物，都不應該駕駛車輛。
若警務人員懷疑車上司機酒後駕駛，係有權要求該駕駛者接受呼氣測試，如呼氣測試報告顯示出駕駛者體內嘅酒精比例（如下表），超出法定限度的話，則必須另外進行呼氣、血液或尿液檢驗；一經定罪，初犯者會被扣10分，或可能會喪失駕駛資格（停牌時間長短由法庭決定），再犯者更會被吊銷駕駛執照（2年或以上），以及嚴重者最高罰款$25,000同監禁3年（駕駛者如無合理理由拒絕提供呼氣、血液或尿液樣本檢驗，亦會受到同樣懲罰。
由一九九九年十月一日起，駕駛者嘅法定酒精限度為：
每100毫升血液內含50毫克酒精；或
每100毫升呼氣內含22微克酒精；或
每100毫升尿液內含67毫克酒精
任何駕駛人士如被發現體內酒精含量超出法定限度，將會被起訴。
資料來源：香港運輸署