一直在美國生活的原子鏸，參選港姐之後便留港發展，其母鄭佩佩則經常中、港、台忙於拍戲，所以兩母女聚少離多，難得今年鄭佩佩放下手上的工作，趕返香港跟愛女團聚，還一起到九龍塘又一城的又一棧吃齋。
當日原子鏸跟母親鄭佩佩在又一棧團年，二人一坐下就傾不停，鄭佩佩說：「我同子鏸好夾，淨係食嘢都已經口味一致，大家都係食素，但我同佢係唔同宗教信仰，我信佛，佢就信基督，不過唔同宗教都唔會將我哋距離拉開。」
原子鏸對中國傳統的農曆新年認識很淺，她說：「喺外國時，每年中國農曆新年我哋都冇假放，不過媽咪每年喺元宵節都會帶我去三藩市睇大型巡遊慶祝新年。」
新的一年，鄭佩佩希望女兒事業愛情皆得意，她說：「子鏸同鄧健泓拍拖幾年，都好穩定。最希望就係佢事業可以更加好，因為佢真係好勤力，學國語、學唱歌、學跳舞、又學結他，個女咁勤力，希望有機會可以幫個女出唱片。」
採訪、攝影：卓美娟