備受車迷注目嘅三菱LancerEvolutionⅧ，北美版雖已於較早前現真身，但日本本土版卻於今日才正式登場；雖然新車造型與舊有型號相近，但經改良嘅車身包圍部件、車廂配搭，以及機械結構等等，都令新車有更出色嘅表現。據聞本港不少獨立車行已對其虎視眈眈，不如今日一齊嚟先睹為快，睇睇新車有何吸引力啦！
記者：鄭達基
若然話LancerEvolutionⅧ嘅造型，與上一代型號相近，相信大家都唔會反對；但當你細心留意下，定能察覺到車頭鬼面罩屬全新設計，就連車身上嘅包圍亦經過改良，從而可改善行車時嘅氣流擾動情況外，更可有助改善Intercooler等設備嘅冷卻效果，以增強持久性。而由碳纖維製造嘅大型尾翼，不單止重量有所下調，而且重可以增強高速行車時嘅下壓力，令行車更穩定呢！
新車仍配用一台編號4G63嘅2.0公升直4DOHCTurbo引擎，並經過廠方精心改良，雖然馬力輸出依舊保持響280ps/6500rpm，但扭力輸出卻增多1.0kgm，達40.0kgm/3500rpm，配以一套6前速CloseRatio手動波箱，從而令性能表現更強更勁。制動系統亦依舊用上Brembo嘅產品，輔以EBD及ABS等電子系統，從而亦能有出色嘅制動表現呢！