一位讀者Chee來電郵，十分捧場，內談及：「由於電腦的普及，有些國內朋友（上海、天津）要求介紹一些國外文章，讓他們在網上讀到，了解國外的思想、生活，我覺得先生的文章內容很適合他們，但由於你用廣東方言表達，他們讀來有些不明，我希望先生的文章能讓更多人讀到，流傳於全部的華人社會，所以我懇請你改用現代中文，先生以為然否？」
讀者Chee講得啱，自九七年七月本欄開始，左丁山刻意用廣東話為文，眨吓眼過咗五年半，又好似一路都幾受歡迎噃，得到唔少讀者擁護，如果全部改番晒白話文，唔知會唔會趕客呢？英國足球諺語話：「唔好改變贏波陣容。」除非編輯見到市場有需要（即係讀者唔想睇廣東話文章），否則本欄嘅三及第式文筆唔會變。
前星期有幸與馬圈才子余伯樂嘅昔日中文老師H教授食飯，H教授話粵語係歷史上嘅古中原音，透過歷代移民（從北到南）方向而在廣東保留下來，所以廣東話有九音，讀古詩唐詩最押韻，用普通話念李白杜甫詩句，就失去原汁原味，故此白先勇到嶺南大學講詩，請上千名聽眾誦詩，亦係用廣東話也。唔好以為內地人中文一定叻過我哋好多，原來北京大學生嚟香港讀中文，學懂廣東話九音之後，先至學作詩、皆因現代北京話混雜咗好多金人、蒙古人口音，唐朝李杜唔識聽！