保安局局長葉劉淑儀呢兩日收晒火，八方班同行無論點激佢，都擦唔出火花，搞到大家冇晒癮。明眼人一睇，都估阿姐有高人「指點」。
葉劉因為二十三條民望大跌，佢都唔緊唔理，咁邊個搞得佢掂？當然係佢老細阿董同埋行會嘅集體力量啦。
所以老董日前就行出嚟，拍晒心口話呢單嘢佢老哥親自過問，又叮囑同事要搞好立法工作，照顧市民疑慮云云。咁葉劉雖勇，都惟有淨係話呢樣行會冇傾，嗰樣有待決定，避晒啲敏感問題。當然佢表面雖肯就範，但係字裏行間都死撐，又話九月嘅建議已經好寬鬆，唔肯認讓步。
重有，佢份意見滙集都搞嘢，見到啲數據對自己非常有利，就列出嚟話好少人要求出白紙草案，大部份都冇表態，真係屈得就屈。不過，原來支持出藍紙嘅等於零，呢單先係大新聞。
（圖）葉劉收晒火，問佢乜嘢都冇大反應。
傳真︰2623-9278
電郵︰