民政事務局局長何志平搶鏡奇招層出不窮，噚日再獻新猷。何局長開記者會講幫助病態賭徒措施，地點選喺香港公園內嘅「羅桂祥茶藝館」，已經係一奇招。
記者入到場，竟然見到何局長施施然學茶道，由專業茶藝師指導下煲水、溫杯燙罐、洗茶葉、泡茶、斟茶……搞完一大輪，先沖好幾杯鐵觀音請記者品嘗，佢重笑住話杯茶味道「有啲急、有啲緊張，好似沖茶人嘅心情。」到咗呢一刻，記者差啲唔記得原本係嚟聽何局長講病態賭徒嘅問題。
何志平即使唔係有史以來第一個，亦肯定係問責制下第一位「斟茶局長」，不過比起郁啲就鬧記者「誇張失實」，同傳媒紮晒馬嘅保安局局長葉劉淑儀，何局長嘅懷柔招數都幾使得，唔知何局長會唔會建議葉劉學吓佢請記者飲茶、冧吓傳媒呢？何志平馬上畀頂高帽葉劉戴：「佢有佢嘅魅力！」
講飲茶講到頭頭是道，不過講到前日去維園花市四百八十蚊買嘅水仙花，何局長即刻扁晒嘴，因為俾老婆胡慧中鬧佢買得貴：「已經要減薪，你重唔講價！」何局長惟有賴記者圍住影相，搞到佢唔好意思講價。
（圖）何局長親手奉上親自泡嘅鐵觀音，記者唔客氣一人一杯慢慢品嘗。 黃賢創攝
傳真︰2623-9278
電郵︰