新一屆港區政協委員嘅名單已塵埃落定，不過，原來重有啲人唔係幾開心，其中竟然包括楊鐵樑。
唔係話所有做過老董內閣成員啲行會議員都有份咩？但係楊官就同八方投訴，冇人搵過佢，等佢連SayNo嘅機會都冇，語氣俾人以為佢有「吃不到的葡萄是酸的」嘅感覺。其實楊官係笑住咁投訴，佢話自己都七十幾歲人，重做乜嘢政協吖，今日外滙基金投資公司開埋最後一次會，佢就真係功成身退，正式同所有公職說再見喇。
至於今個新年，佢同楊太都冇打算外出。退休後，楊官話會做吓義工，早前佢喺青協教英文已經教晒十堂，覺得好有意思，連人都後生埋，啲年輕人有成五千個問題想問佢，真係唔答得咁多。下次佢準備同啲年輕人講吓西方禮儀：「啲後生仔第日都有機會做經理㗎！」唔講唔知，楊官原來係青協副贊助人，唔怪得咁幫王䓪鳴啦。
傳真︰2623-9278
電郵︰