明天便是年廿九，一心諗住可以同屋企人食餐團年飯，點知臨時要返深圳工作。雖然計劃有變，不過好彩深圳重有好多酒樓年中無休，所以揀了兩間打破傳統，大賣創新菜式的酒家作為今年食團年飯的基地，一間以獨特的南瓜盆菜為號召，另一間則主打各式自創的團年小菜，兩者均各具特色！
記者：黃希知
攝影：林監琛
售價：?80?位（四位起）
經理話南瓜盆菜一共有二十款不同的菜式組合，所以我第一時間睇睇裏面有乜好食。我發覺佢賣相創新，連材料都略為改良過，經過解構後，底層基本上同傳統差不多，同樣有蘿蔔、粉絲、炸芋頭、薯仔、南乳枝竹燜火腩、燜門鱔等，而面層則鋪滿較為名貴的菜式好似玉環瑤柱甫、髮菜蠔豉遼參、白靈菇扒鵝掌，蝦碌同燒味，食食吓居然重被我發現有白切東山羊，用海南細羊以潮式滷水燜到皮爽肉滑，在盆菜中加入羊肉，幾有新鮮感。
負責人表示南瓜全部由江西運返，所以特別巨型，而最令我意想不到的是盆菜在捧上給客人品嘗時，都會由兩位侍應以抬轎形式將盆菜原個由廚房慢慢抬出再搬上枱，食盆菜食得咁有氣勢，真係未食先興奮！
如果對創意盆菜無興趣，我就介紹呢個大展鴻圖宴畀大家，一圍有十二個菜，每圍十位用，埋單?3,280，包括蟹肉蟹黃燴生翅及鮮果大拼盤，𠵱家介紹其中兩款較特別的菜式給大家！
六福臨門即六種不同的涼菜小食，其中以北京老虎菜較少見，菜絲配合蒜頭醋等生食，輕微的天然辛辣味最特別，但未必人人鍾意；另一款必試的是加入紅油及北京煙脂蘿蔔的牛百葉，辣而爽脆。
百靈菇驟眼睇真係同鮑魚幾可亂真，雖然無鮑魚咁矜貴，但亦屬貴價菇之一。大廚將百靈菇配以鵝掌，用上以老雞、火腿、鮑魚等熬製的鮑魚汁來扣，百靈菇入口爽滑清甜，與鮑汁的鮮味配合得宜。
丹桂軒
電話：(86)75583895138?82323668（羅湖商業城分店）
地址：深圳福田區車公廟天安數碼城天安會所3樓
營業時間：上午7時半至晚上11時半
備註：盆菜需於五個小時前預訂
唐宮以各式各樣創意點心同菜式最出名，團年飯都唔例外，加上價錢實惠，即使一大班人食都係所費無幾。
售價：?48
這是大廚原創菜式海鮮盞，用炸過的錦滷雲吞皮做成一個個好似金盆的盞，裏面堆滿不同的海鮮粒好似銀鱈魚、帶子、蝦仁、粟米、雜菜粒等。全部炒香後放滿成個金盞，同個名一樣，金同銀堆到瀉！
售價：?48
問大廚先知這亦是他自創的fusion菜之一，概念來自炸小棠菜，在自己打製的墨魚膠內混入小棠菜及法國鵝肝醬，外層再蘸上日式天婦羅粉，炸至外層金黃色，驟眼睇似一塊金磚，加入法國鵝肝醬後，食起來都感覺矜貴！
唐宮海鮮舫
電話：(86)75582178790
地址：深圳市新園路一號中海商城六樓
營業時間：上午7時半至凌晨12時