公立醫院急症室去年底開始收費，免費睇急症嘅年代結束，市民求診習慣或會改變，私家醫務所、藥房，趁機擴張業務。過去兩個月，就有近二十間該類型商舖開業，每月總租金近一百五十萬元。
中原潘志明報料，舊年底開始，醫務所、藥房租舖成交個案陸續出現。
好似一間醫務所，就租咗中環德輔道中303至307號一至四樓全層，合共兩萬方呎樓面，月租金十四萬元，租用嘅樓面係近期多間醫務所中最大。
醫務所、藥房租多咗舖，但並唔代表佢地會亂咁搶舖嚟租，潘志明話，佢哋只會揀啲交通方便，上班一族經常出入嘅地方，好似中環、灣仔等地區，又或者人口稠密，例如大型屋苑，因為呢啲地區有潛在顧客。
租金方面，有藥房就以每月三十萬，租咗中環德己立街2至18號A及B舖，間舖二千呎，每呎租金就要百五蚊，都相當有實力！蘭西諗呢類型舖頭開多咗，生意競爭大，到時買藥同睇醫生唔知會唔會鬥平？
平日好似「開籠雀」咁嘅恒基地產營業部總經理張炳強，原來好有善心㗎。佢話今日嘅香港人對死亡呢兩個字好抗拒，尤其就快農曆新年，中國人通常都唔鍾意聽到唔吉利說話，張生就話百無禁忌。
原來佢已參加咗善寧會（前稱善終服務）有五至六年，重係終身會員㖭，平時會去探訪末期癌症病人，開解吓佢哋，等佢哋可以積極面對餘生。聽講，呢類心靈治療比好多止痛藥重有效。張生話近排因為多嘢做，少咗參與，之但係，最緊要有心嘛，呢個榜樣後輩應該好好學習。
辦公室風水對做生意嘅人嚟講都好注重，最近尖沙嘴東海商業中心（圖三）一個向海同噴水池單位，據講因為風水好，引嚟三名租客爭租情況。結果由製衣公司租成咗，呎租二十蚊。
美聯鄺寶謙講，今次引起爭奪戰嘅東海商業中心中層02室，1254方呎，只係交吉咗一個禮拜，就以每月2.508萬元租出，租期兩年，有一個月免租期。呢類型單位多由業主自用，好少放盤，啱啱租出嘅單位，前租客都係因生意好，要擴充業務先搬走。
再過兩日就係羊年，地產代理搏殺成年，好多都會趁機唞唞，同家人樂聚天倫，而今個月一同二手市場都靜，因此，鴻運地產董事總經理田國強就索性由今日起全公司休市，至年初三先啟市。但係新盤項目組初二就要開工，因為要準備做荃灣名逸居。
田國強（圖四）重預早向各界拜年，祝大家「心想事成」，佢就希望公司業績可更上層樓，樓市就有一番新景象。
城中矚目嘅數碼港貝沙灣就快面世，電訊盈科已密密同代理及傳媒進行概念灌輸工作，俗稱洗腦行動。地產代理早排就要考試，及格至可參與促銷，可見電盈要求幾嚴格。聽聞有成千個經紀參加考試。電盈噚日就舉行第二個講解會，順道公布考試成績。
首屆考生及格率達99.8%，重有七位代理攞滿分，取得成績優異獎，分別係中原、美聯、香港置業、鴻運、仲量聯行、利嘉閣、世紀21各一名。中原同美聯攞最突出表現獎，港置同鴻運攞最積極參與獎，最高及格率係利嘉閣同仲量聯行。
會上重順便發放單位平面圖（圖五）及會所資料，代理攞住資料，做嘢都方便啲。此外，美聯物業舊年承做最多太古地產嘅維景灣畔同逸濤灣推銷，噚日獲太古頒獎嘉許。
中原地產董事總經理黃偉雄夠晒多才多藝，今次染指廣播界，替新城財經台嘅新城地產街節目做嘉賓主持。今日錄音，節目安排喺年初一出街。第一集請嚟九倉助理董事黃光耀，同測量界嘅代表林增榮做嘉賓。為咗題目要貼市，黃董話要做足準備工夫，重要到最後一日先定講題，務求當日講嘅嘢最新鮮。黃董重話，今次已經唔係第一次做嘉賓主持，但心情依然緊張，事關做主持要頭腦清晰同埋做功課。錄完音之後，黃董會去海南島度假三天，打高爾夫球，初三開工。
蘭西
電郵地址：
