無綫劇集《皆大歡喜》雖然已經播完晒，但薛家燕（好姨）、阮兆祥、趙學而、謝天華、林文龍同廖碧兒等，會推出賀年歌專輯《皆大歡笑》，實行同一樣出賀年歌嘅Twins鬥過，不過好姨話大家路線唔同，各有各做喎。
《皆》劇成班藝員今次唔着古裝，一律以時裝造型示人。男嘅就扮黑超特警，不過佢哋攞住奶樽、鑊鏟同廁所泵，非常搞笑，女嘅就扮到靚靚，成班OL咁。好姨解釋因為《皆》劇已經播完，佢哋喺下月會為新開嘅《皆》劇時裝版試造型，所以趁住呢次拍唱片封套，學吓點做時裝人，當做熱身咁話。
好姨喺碟中有首獨唱歌曲叫做《等愛的女人》，好姨嘅大女石祐珊講過希望阿媽早日搵到第二春，但好姨覺得呢啲嘢要睇緣份，佢揀男友嘅首要條件係要對方夠可靠，千祈唔好令佢再孭包袱喎。
另外，好姨噚日同《皆大歡喜》演員，喺九龍塘宣傳新碟，佢話：「下月十四號會有歌唱比賽，參賽者要改《皆大歡喜》主題曲嘅歌詞，到時會送十隻金羊。」
王書麒同許秋怡噚日去九龍塘羅浮宮影婚紗相，許秋怡本來身材平平，但噚日佢着住件婚紗，好似好有睇頭。許秋怡話：「係呀！有咗之後，最大好處係個胸大咗，三十二變三十六，着婚紗都好睇咗！」
除咗呢個好處之外，原來大肚婆重有其他着數，秋怡話：「就係講價唔會俾人鬧㖭！」
張可頤噚日喺沙田宣傳無綫劇《九五至尊》，可頤講起套劇，就連歎三聲，佢話：「真係好辛苦，初時以為做呂四娘好，舒舒服服，點知接到劇本先知要打到飛起，又要行梅花樁，又要做空中一字馬，做完啲武指都話我勁，話我可以做楊紫瓊第二，點知我第二日就瞓咗喺床度，返唔到工。」
東魅開拍嘅劇集《飛虎雄師》噚日喺九龍城一個天台拍一場黃浩然挾持王天林同關秀媚嘅場面，但因為槍戰場面太嘈，結果俾住客投訴，警察到場了解，將一啲避彈衣同假槍帶走。
另外，有一個製片重被帶返警署協助調查，導演劉寶賢噚日話：「今日都唔算正式拍，只係試戲，但俾人投訴，所以有警察攞走避彈衣同假槍，有個工作人員要去警署落口供。」
葉玉卿噚日接受港台訪問，問到佢生活近況同新年時會做啲乜，卿卿就話：「新年我基本上係用美金二十蚊嚟封利是，過咗年廿九我就會拜佛，連屋企囝囝囡囡都要一齊拜。」
卿卿第三個囝囝已經改咗名叫育然，佢話：「我請相士幫個仔改名，重要配合八字，相士話育然好聰明。而哥哥初時見細佬出世都會妒忌，但𠵱家就好錫細佬。」
