話晒年尾流流，小初重諗住大家都準備收工過年，但噚日靚女經紀又打電話嚟，話第一龍浩（875）似乎又想開車，唔排除係為配股集資鋪路，噚日隻股又蠢蠢欲動，所以叫小初留意吓。
第一龍浩噚日一度湧過上去0.099元，收0.096元，升5.49％，但成交金額只得132萬銀，似乎尚未成氣候。
雖然小初唔係唔信靚女，之不過呢隻股頗為難炒，次次股價炒咗上去，好快就見有沽盤將佢推番落嚟，都唔明佢究竟係街貨太多，還係炒家無力之故，總之隻股就成日喺0.085元至0.11元之間徘徊，暫時尚未見到大升浪的迹象，甚難賺到佢錢。
之不過咁，第一龍浩想做嘢嘅意圖就好明顯，好似佢由舊年開始，不斷收購新業務，而原來的鰻魚飼料業務亦在月初公布出售，聽聞稍後重有唔少收購會搞，所以都唔係無炒作藉口。
但小初心諗，橫掂都就過年，不如過咗新年，睇吓咩環境先至決定買唔買好過。
慕容小初