早幾日舉行嘅美式足球超級碗賽事，全美有接近一億觀眾昅到實，所以喺嗰個時段賣廣告亦特別貴，短短三十秒索價二百一十萬美元（約一千六百萬港元）！不過據我羅拉所知，其實有超過一半觀眾係志在睇廣告先至睇超級碗㗎。
有咁多人睇，幾部矚目猛片包括《22世紀殺人網絡》續集同第三集、李安嘅《變形俠醫》同《神探俏嬌娃》續集自然乘機播放預告片啦，當中五月上畫嘅《22世紀殺人網絡》續集《MatrixReloaded》同十一月嘅第三集《MatrixRevolutions》可算係至吸引。
其實之前大家都可能睇過呢部戲嘅預告片，但係今次廣告多咗唔少新嘢，好似飾演救世主Neo嘅奇洛李維斯（KeanuReeves），可以好似超人咁喺夜空中飛來飛去，視覺效果重堅過上一集。
另外，上集追殺佢嘅特務Smith，今次亦會變出一百個替身，圍揼奇洛仔，不過喺袁和平身上學咗唔少嘢嘅奇洛仔，亦不甘示弱，揦起支棍掃到成班特務飛上半空，睇到我羅拉眼定定。