新春在望，本來好應該互相恭賀一番，拜個早年，但家陣嘅香港地就確係好難笑得出。
八方一位朋友苦中作樂，整咗首互聯網上廣泛流傳嘅《打工仔七言絕詩》，反覆吟誦，果然好絕，簡直係時代巨製，絕對係香港三百萬打工仔嘅血淚寫照。
最絕嗰幾句係：「上司老闆夠無良，病都要做鬼體諒；同事犯錯有你份，重要鬧你正粉腸。開會猶如打靶場，俾人插到啪啪響，翻開肚皮睇全相，鬧完重要拍手掌。」係就係粗鄙咗啲，但的確係你同我嘅典型際遇。唔夠喉嘅話，不妨欣賞埋附表。
如今打工甚淒涼，返工慘過去打仗
其實只係為兩餐，唔係打劫唔係搶
……
看更原來識雞腸，掃地都要寫文章
學士碩士唔馨香，因為博士都在場
人工一定唔理想，七千左右已中上
十二個月無雙糧，兩年合約要裝香
……
公餘進修係妄想，回家食飯無商量
想話請假來休養，老細面似屎一樣
晚晚加班做七日，唔通個個嫌命長
日日返工似喪屍，十足幾年無沖涼
……
年尾流流高危日，偷懶都係咪咁揚
香港打工係咁樣，大聲疾呼──吹脹
傳真︰2623-9278
電郵︰