楊受成旗下的周刊，昨日指張栢芝遭經理人向華強太太陳嵐放棄，向太為了愛將栢芝，即時向楊受成發炮，她昨日在新片的祝捷會上致電楊受成，聲稱已驅趕了該周刊的一位攝影記者，而怒火中燒的向太，更大罵楊受成「離晒譜」。
楊受成旗下周刊《東方新地》昨日報道張栢芝自失戀後，工作及私生活混亂，所以遭經理人、即中國星老闆娘向華強太太陳嵐放棄。向太昨日對此報道勃然大怒，公然指摘楊受成不是。事件中的主角栢芝，目前則身在北京為「春節晚會」綵排，其實栢芝早前在演藝人聲討《東周刊》的大遊行中，亦曾高呼「打擊楊受成個×街」，雙方可算是水火不容。
向華強夫婦、古天樂及鄭秀文昨日出席在上環舉行的《百年好合》祝捷會，向太甫到場，便即時大罵楊受成旗下周刊，問在場的人誰是該周刊的記者，除叫人立即趕該名攝記離開之外，還激動得即時在記者面前致電楊受成。
向太傾完電話後，勞氣地向在場記者說：「今朝早有人打電話畀我，話有周刊屈我同栢芝不和，要放棄栢芝，聽到好火滾，佢哋唔使搵記者嚟寫，搵個攝記嚟影相就得，上次影Sammi（鄭秀文）又話佢好腫，嗰日佢幫我部戲拍海報㗎！Sammi一啲都唔腫。」
向太又即時轉述與楊受成通電話的內容，向太做了一個打電話手勢說：「我啱啱打電話畀佢（指楊受成），同佢講話我趕咗佢個記者走，楊受成話好呀！好呀！扮冇嘢到話叫我告佢哋，離晒譜，扮唔知，我又唔信佢會唔知呀！我睇到咁多演員俾人屈，真係瘦廿磅。」
向太續道：「我問過佢可唔可以停一停，真係個幾月冇搞過，𠵱家又開始番，冇寫栢芝嗰排又寫Sammi，Sammi拍我戲，係咪同我有仇？栢芝話全港冇經理人公司，都唔會簽英皇，栢芝一定會笑我話：『乜你唔係同楊受成好朋友咩，屈我唔緊要，但屈埋你。』」
據向太透露，中國星與栢芝簽了十五部片約，現時只拍了六部戲，尚有多部未拍，絕無理由放棄栢芝。向太不滿地說：「係咪儍㗎？吹脹，我對演員冇話唔鍾意佢哋，我都用阿嬌（鍾欣桐）拍戲（《同是天涯快樂人》），唔係一本雜誌可以砌低兩個演員嘅，好似阿嬌話《忽周》摷垃圾要告人，都係《東地》摷栢芝垃圾先啦，要鬧就鬧自己先。」
而英皇藝員管理部總監霍紋希，昨日就向太大罵楊受成一事，表示英皇與雜誌《東方新地》完全獨立，沒有掛鈎。對於張栢芝表示就算沒有經理人公司簽，也不會為英皇效力，霍紋希說：「我唔會發表言論傷害人，每人都有佢權利，好彩英皇係明星工廠，暫時毋須外求，我哋關係良好，重會有合作。」
採訪：魯萍 攝影：甄朝健
