美股前晚反彈，杜指急升99點，唔少人都估到。趙飛雲估唔中嘅係港股昨日冇段好睇，恒指一開就跌，整日在負區，結果收報9240，跌84點。恒指Put輪9556彈上0.16元收，趙飛雲沽早一日，以百分率計賺少8%，心情梗係唔多好。
港股開市之際，正係布殊發表國情咨文之時。呢個牛仔總統雖然冇講明幾時出兵，但指伊拉克蔑視聯合國嘅要求，又話會喺2月5日向聯合國提交證據，證明伊拉克擁有違禁武器。呢番說話，令人覺得美伊好快就會開戰，美股期指及美元被人質低，港股彈都冇得彈。
睇番張圖，恒指昨日之低位及收市價，均低於上一浪底（去年12月30日），正式展開一浪低於一浪嘅走勢。不過，9RSI尚未認同，上一浪底之9RSI係21.1，昨日則為26.2，同價位走勢背馳。
股市勢弱，人人都知，但係現在再追沽，尤其是農曆年長假在即，趙飛雲就覺得風險頗高，值博率唔夠。恒指技術指標背馳，隨時會先來一個較「似樣」嘅反彈，先至回復尋底之旅。其實個別大藍籌真係好超賣，例如滙豐（005），昨日9RSI落到15.6，而911事件期間，最低亦不過係14.5。
趙飛雲唔係轉做好友，只係覺得去年10月嘅上升裂口（8990-9131）會有一定支持，恒指落到9100左右料有反彈，但經過昨日一跌，估計反彈唔易升破9400水平，到時可以再買恒指Put輪，對象係9587。今日除非個市大幅反彈，否則老趙一於唔揸貨過年。
趙飛雲