有傳媒報道，若港府在公布財政預算當天重未有削減財赤良方妙藥，當晚港元便可能受到衝擊。阿虎認為，港府喺23條立法諮詢事件上收到9萬幾份意見書，唔使1個月就整理好，效率之高真係史無前例，財赤問題由去年公布財赤趨勢至今逾1年，都未諗到具體解決方法，不如將葉太調任做財政司司長，或者她可以在1個月內諗出9萬幾個解決財赤方案，咁阿董咪唔使咁愁囉。
港股見美國國情咨文無咩新意，亦無定開戰日期，跌幅只係一般，恒指收報9240，跌84點，成交只得63億元。
麗新發展（488）及豐德麗（571）雙雙停牌，ｉ師傅話，麗展可能會出價每股至少0.275元私有化豐德麗，涉資不足8000萬元，但麗展就可變相唔使償還欠豐德麗嗰15億元。嘩，麗展就真係大想頭。雖則話豐德麗成交稀疏，基金客難以套現，但出手無理由如此低。單單呢15億元債權就相當於豐德麗每股2.6元。若果麗展咁出價法就真無誠意，唔該添啲啦。
有消息話農曆年長假，國內休市期間資金會轉戰香港，不過噚日隻馬鋼（323）預期去年賺多50％，但股價都無咩反應，午後才有買盤入市推高3％，似乎中資錢重未到位，不過初四開市表現可能會更勁，今日要買就趁手囉。馬鋼噚日收0.68元，仍然是毫子股，最合中資炒家口味。
華能（902）斥近24億元人民幣收購深圳能源集團25％股權，被分析員指作價過高，股份隨即遭拋售跌3％，收報6.35元，成交達2.4億元。其實貴唔貴見仁見智，不過芬佬喺高位獲利回吐就肯定係真嘅。
阿虎