港股又一日企硬，歐美股市前晚續散，杜指8千關穿埋，但恒指昨日裂口低開61點後，就彈番上去，全日反升26點，趙飛雲呢類淡友，梗係有多少失望。
港股有此表現，趙飛雲諗到兩個原因去解釋。第一係今日期指結算，有人需要頂住；第二係歐美股市已呈超賣，反彈隨時出現，加上聯儲局議息，布殊今晨發表國情咨文，故此唔少淡友先計賺錢數。
其實歐美股市真係相當超賣，以前晚收市計，英國富時100指數嘅9RSI，跌到落去11.7；法國CAC40指數落到去16.7，杜指亦低至22.7。3大指數9RSI落到咁嘅水平，短線反彈係理性預期。以圖表走勢而論，港股本身亦有反彈條件，恒指同個別大藍籌如新地（016）等，9RSI已見背馳，淡友開始要留神。
趙飛雲一早上行，見到歐美市前晚續插而港股跌唔落，於是唔等恒指補下跌裂口，先將倉內隻9556沽出計賺錢數。雖然係咁，趙飛雲並未轉View睇好個市，只係估有短線反彈，目標係9450-9550，到時若無特別利好消息，就會買番恒指Put輪，不過今次對象唔係9556，而喺年期長啲嘅9587。
昨午食晏碰到位老友，佢叫趙飛雲過咗農曆年後，留意隻意科控股（943），應有收穫，側聞公司會有好消息公布。返到公司睇吓張圖，見到隻股近排跌到落19仙水平就企硬，似乎有人密密收集，確係值得留意。
趙飛雲