原來一分耕耘一分收穫呢句說話唔係呃人嘅，日本巨胸水着女星MEGUMI過去一年嚟，為唔少雜誌影咗大量性感寫真，你可能覺得一個水着女星幾勤力都冇用，佢哋始終好難同啲日本年度大獎結緣。但係好鬼勤力嘅MEGUMI就殺出咗一條新血路，近日日本一本權威HipHop雜誌《warp》就頒咗一個「2002WARPAWARD大獎」畀佢啦！
基本上可以當選「2002WARPAWARD」嘅全部都係「流嘢」，不過就係同時裝界、HipHop界同板仔界有關係嘅「潮流嘢」，今年當選嘅MEGUMI可謂十分巴閉，本雜誌大讚佢舊年不但止喺寫真界有出色嘅表現，而且喺電視同舞台劇等各方面都好活躍，所以特登頒個獎表揚佢。
開心到飛起嘅MEGUMI喺領獎嗰日，特登將自己打扮到成個神奇女俠咁，又變身性感滑板妹大擺有型甫士影相。MEGUMI重乘機自我推銷咁話：「其實我好鍾意Fashion，最好有多啲時裝雜誌搵我做model啦！」