政府唔知係咪趁住大家掛住搞《基本法》二十三條，噚日公布咗三位女高官嘅新任命。旅遊事務專員黎高穎怡將會喺下個月二十四號，出任公務員事務局常任秘書長；公務員事務局副秘書長王倩儀會接替早已開始退休前休假嘅梁世華，出任康樂及文化事務署署長；工商及科技局副秘書長鄭汝樺就接替黎太，做旅遊事務專員。
係人都知，政務官即係AO一族鬼咁麻煩，又意見多多，搞到王永平頭都大埋，皆因大家以前係同事，但係平哥今日已貴為問責高官，脫離公務員隊伍，班AO點信得過由平哥代表佢哋嘅利益？
至於王倩儀，就嫌佢太低級，唔夠牙力同佢哋爭取福利，所以平哥先至作出今次調動，咁班AO唔可以再唔服氣啦。
黎太將會成為政務官職系之首，要為五百幾個政務官爭取利益，但另一方面又要輔助公務員事務局局長王永平推行政策，將來可能出現左右做人難嘅局面。不過，有政務官同八方講，黎太處事手法向來「剛柔並重」，應該難佢唔到。
問到黎太對新任命嘅感受，佢話：「我期待同局內外嘅同事緊密合作，多多溝通，共同面對未來公務員事務工作上嘅挑戰。」
順帶一提，今次嘅高層調動，職級上屬首長級第六級嘅黎太會署理第八級，其餘兩位則係首長級第四級署理第六級，個個都升兩級，唔怪得人人都話全力以赴啦。
傳真︰2623-9278
電郵︰