台灣光華新聞文化中心主任路平卒之來港履新，外形成個明星咁款，着得咁鬼casual，幾有型噃。前任江素惠，好注重外表，成個貴婦look，兩位主任完全唔同風格。江素惠以前做得好有成績，為國民黨政權統戰得好成功。現在民進黨當權，睇吓路平呢位平民作風嘅主任，可唔可以超越前人。不過陳水扁上台後，完全唔重視香港工作，路平即使想做事，都恐怕限制太多。
既有台灣官員來港上任，不如睇吓台灣前途。肥佬L呢兩年專注台灣發展，成日踎響台灣，成為台灣專家。呢日佢打電話嚟傾閒偈，祝我羊年行好運，我又祝佢羊年威震台灣，佢話過年喺台灣好有氣氛，唔會返嚟拜年喎。台灣其實有好濃厚嘅鄉情，家庭觀念重過香港好多，唔似香港純商業社會咁涼薄。問肥佬：「如何比較台灣、香港？」
肥佬話：「台灣香港兩地都被黑霧籠罩住，不知方向，亦睇唔到前景。唔同嘅係，台灣區有一盞燈開着咗，打開窗，大風吹走黑霧，就一定光明。香港盞燈就壞咗，就算冇咗黑霧，都睇唔清楚。」幾玄妙，諗咗一陣，肥佬索性澄清：「台灣人一片樂觀，充滿信心，兩年後選舉，吹走烏雲，就掂晒；香港冇得選，惟有等到二○○七，望天打卦，睇吓可唔可以換到好燈膽！」民主選舉嘅最大好處，唔係效率、唔係透明度，而係假若人民唔滿意，可以定期換人！