無綫高層前晚喺將軍澳一間酒樓同近二十位包薪藝員一齊食團年飯，兩對緋聞男女羅嘉良同宣萱、古天樂同郭羨妮都有出席，但嘉良同宣萱就表現大方，不避嫌一齊坐，反而最遲嚟嘅古仔，同郭羨妮雖然同枱，但兩個人就打對面坐。
嘉良前晚喺食飯前，先同向海嵐打番幾圈麻雀，向海嵐就話輸咗好多錢，打完牌之後，嘉良知道老友郭晉安同宣萱主演嘅《戇夫成龍》收視勁，好戥佢哋開心，所以特登自掏腰包，叫咗一支香檳畀大家慶祝。
至於呢期人氣十足嘅郭晉安，就俾記者拉住同喺《流金歲月》中扮智障嘅胡杏兒合照，初頭胡杏兒話好怕俾人定型，所以唔想影，但郭晉安覺得大家都係靠做儍嘅角色食胡，一齊影冇所謂啦，佢重抵死到話最好下次開套《誰可相依》，搵胡杏兒做佢阿媽喎！
而古仔就話佢嘅檔期已經排到八月，未知會唔會返無綫開劇，但可以開套十二集嘅劇都唔錯，佢重提議最好搵埋楊千嬅做拍檔。
陳松伶噚日喺尖沙嘴幫一隻內地牌子嘅洗頭水做宣傳，做得代言人就梗係要賣花讚花香啦，點知松松好誇張咁話，如果啲洗頭水唔好用就罰自己做一個月洗頭妹，不過假如真係有人用過話唔好用，唔知松松會安排自己去邊度幫人洗頭呢？
亞視嚟緊會推出賀年節目《洋洋得意話新春》，噚日請咗吳文忻做嘉賓。吳文忻第一次去亞視錄影，佢話：「我都自由身成年半，外面風大雨大，真係想搵個好歸宿。呢年幾我香港、內地兩邊走，不過就好少拍戲，其實有部劇出街真係好好多。」
吳文忻好支持二十四小時通關，佢話：「平時登台完咗，可以即刻返香港。」
張豪龍同石修兒子陳宇琛噚日喺油塘拍新戲《少年刀手》。之前有傳張栢芝幫細佬張豪龍搭路做無綫《勁歌金曲》主持，張豪龍就話：「係有傾做主持嘅嘢，但唔係《勁歌》，係《翡翠音樂幹線》，但都未定，家姐有幫我問嘅。」佢重話新年想去美國，但係冇稅單，所以驚美國領事館唔簽證畀佢。
許秋怡、羅家英噚日喺有線錄賀年節目，有咗BB嘅許秋怡戴咗隻大約兩卡、價值八萬幾嘅鑽石戒指出席活動，佢話係未婚夫王書麒送嘅結婚禮物。佢又話懷疑自己有產前抑鬱，成日發脾氣，又失驚無神要食麥當勞，搞到王書麒要凌晨兩點幾，揸車去間二十四小時嘅麥記買包畀佢食。
蕭正楠噚日連走兩個宣傳活動，首先去數碼港，然後去啟德嘉年華，但係佢去到啟德嘉年華，已經遲到成個幾鐘，搞到啲fans呆等，有啲fans重話：「佢有冇時間觀念，要人等咁耐。」蕭正楠遲到重對唔住都冇講，面燶燶咁話：「我都唔知點安排時間，頭先塞車，之前個宣傳又要做完先走，咪遲到囉！」
