戶田和幸喺禮拜一終於成為熱刺球員，雖然好多人冇乜睇好呢個日本球員，但我求大俠就唔係咁睇，覺得佢發展空間會幾大。
好多人都認為熱刺今次借用戶田，純粹為咗賺日本人錢，事關佢哋除咗可以將比賽賣畀日本電視台之外，重可以吸引好多日本遊客嚟佢哋嘅球場睇波同觀光。計落條數，喺未來一年賺嘅錢，肯定可以cover到畀清水脈搏嗰三十萬美金，重分分鐘多賺幾倍㖭。
但熱刺領隊荷杜銳意將隊波年輕化，重話唔會用舒活同科特呢兩位年過三十嘅防守中場，所以戶田話唔埋好似喺帕爾馬同飛燕諾搵食嘅中田英壽同埋小野伸二咁，成為自己隊波嘅主力成員。
戶田今次加盟熱刺，最開心肯定係富咸嘅稻本潤一，事關有個同鄉嚟陪佢，可以冇咁悶。但同熱刺一樣位於倫敦嘅富咸就慘嘞，無端多隊波同佢哋爭遊客生意。
俾阿仙奴借到屈福特嘅「神童」彭拿治，喺隊波打得幾好，重周不時俾人讚，而唔知係咪呢個原因，搞到佢心雄咗，竟同阿仙奴領隊雲格講如果第日返阿仙奴冇正選打，就會走人。阿仙奴隊波人才濟濟，連韋托特、龍格保同簡奴都唔一定喺正選。當年十五歲以一百萬鎊加盟，但𠵱家連英格蘭腳都未係嘅彭拿治，竟然有咁大想頭，簡直就係癡人說夢話。
咪以為踢波嘅得鋪蠻力，唔會理周圍發生嘅嘢，好似祖雲達斯嘅法國後衞杜林就好關心世界，重要求停止將武器賣畀一啲踐踏人權嘅國家。杜林咁講：「我哋要向大國政府施壓，唔畀佢哋亂賣武器。」杜林只係個波牛，但都識到體恤其他人，唔知一啲食飽飯淨係識得𢱑腳趾嘅特區政府高官，聽到之後會有乜嘢感受呢？
費倫天拿隊長迪里維奧響聯賽中重創傷咗韌帶，好可能要開刀，假如屬實可能提早收山。呢位世盃國腳響費倫財困、散班到重組降落丙組一直陪伴球會，隊波本季喺丙組排榜首，估唔到佢……呢個世界有啲人為錢離開母會，有啲人營營役役得唔到好報，唔通呢啲就係忠志之士應有嘅下場？