日本萬事得汽車響日前（1月27日），公布咗去年全年嘅業績數據，無論係日本本土製造、出口，甚至係海外生產汽車數目，都較2001年有所上升，成績實在令人鼓舞。
從廠方公布嘅數字中可以睇到，萬事得響日本本土生產私家車嘅總數為716,497部，較2001年上升9%；商用車數量則為57,301部，較2001年下跌達20.5%。至於銷售成績方面，廠方全年共售出215,545部私家車及商用車，較2001年下跌4%；若以單一車型計算，其中Demio（即港版Mazda2）佔其中63,030部，而Atenza（即港版Mazda6）則佔其中20,756部。除此之外，私家車出口數目更高達513,515部，較2001年勁升10.8%，當中尤以323車系佔上大多數（達243,017部）。到最後，廠方去年喺海外生產線所生產嘅汽車數目達169,540部，其中私家車佔104,883部（上升32.3%），商用車為64,657部（上升7.4%）。而廠方亦預期今年嘅業績會更較去年為好，皆因全新Mazda2及Mazda6等車系都備受車迷追捧，有興趣嘅車迷，就要留意廠方於明年公布嘅有關數據喇！