701收料站:耀科績差暫可不理

701收料站:耀科績差暫可不理

小初同經紀陳就嚟變成臭口一族,次次講親衰嘢都非常之應,好似上個星期佢話,耀科國際(143)因為有應收帳收唔到,所以業績唔好睇,點知真係中晒,噚日公布業績,開出嚟真係蝕成2.34億元咁多。
耀科中期業績都話賺成2億銀,點知下半年就左撇右撇,搞到業績咁惡睇。
上次經紀陳講耀科,見報之日竟然係前主席正式被捕之時,雖然股價一度因此急跌,但股價仍然企硬喺0.2元,小初起初重以為壞消息都反映晒㖭,點知衰嘢陸續有來。
經紀陳話,佢估計幕後炒家有心力頂,但耀科業績咁差,大家應該暫時忘記呢隻股。
講完唔好嘢,又想講吓好嘢,就係經紀黃月頭講過,話唔怕買番多少港基(636)坐下,噚日佢笑笑口話沽咗,小初問佢點解咁快沽?佢話噚日升成13.46%,收2.95元,升得咁急應該會回一回,加上銀行賣盤唔會咁快搞掂,等佢跌下先買過。
慕容小初