何志平噚日乘出席維園民建聯攤位開幕之便，偷空行花市買水仙，過程烏龍百出，怕且佢老婆胡慧中，下年都唔會旨意個老公去買水仙。
話說何局長行完民建聯攤位後，就行去鮮花檔買年花，重喺跟實佢嘅記者面前同檔主講價。不過何局長心水非常奇特，又高又壯嘅水仙唔要，竟然要搵未發芽嘅水仙頭自己浸，所以即使第一檔檔主肯主動減價，因為冇水仙頭，都做唔成何局長生意。
到咗第二檔，何局長都搵唔到水仙頭，跟住就猛打電話，唔知係咪向老婆求救。可能何太都知噚日已經係年廿六，一定嚟唔切自己浸水仙，記者只聽到何局長係咁話：「哦！水仙要連埋啲菖買。」佢終於妥協，用四百八十蚊買咗十棵水仙，不過仍然專揀又矮又短嘅水仙，貪其可以擺到新十五。
（圖）何志平係咪打電話請示完老婆大人，先唔堅持要買未發芽嘅水仙頭呢？
傳真︰2623-9278
電郵︰