你知唔知筲箕灣公廁內有幾多格？淺水灣姻緣石上有幾多個喜字？……問題古怪又騎呢，但對於「香港金鐘青年獅子會」主辦的城市定向參賽者來說就相當實用。而其中綿羊谷八支綿羊仔車隊就用了八粒鐘時限，遊勻香港各大名勝。在33隊99人中，我和攝記便分別坐在「大鷹會」和「無敵定向超級勁走羊」車尾，追訪綿羊仔捐窿捐罅的實況。
記者：李玉蘭 攝影：周旭文
逢星期一、三、五刊出
人數：1?人
時限：10:00am?:00pm
任務：不限交通工具，需自訂路線，到達目的地後，隊員要一起影相做證
起點及終點：藍田東社區會堂
大鷹會Tony：「行成20個地方，重有咁多任務，根本無可能完成……都係唔好嘥時間，先去最近嘅黃大仙，其他路線一路行一路諗，唔好緊張！」
德田→（龍翔道）→黃大仙騰龍墟
大鷹隊加無敵隊一行六車七隊員，順利前往騰龍墟。當以為目標在望、在指定景點影相之際，忽然有樂群社職員吳先生說有人投訴大隊拍照，捉住隊員Alan手臂要求交代。雖然大隊解釋有權利在公眾地方拍照，但已被阻遲幾分鐘！
騰龍墟→（沙田㘭道→彩虹道）→宋王臺
在22度氣溫下，隊員Tony扭大強勁音樂，F4的《流星花園Ⅱ》主題曲傍住大隊出發！由於這班網友只見過一至三次面，不太有默契，結果有人行錯路，但電單車好處是可推上行人路調頭再走，終於成功在家計會門前截停一對母子影相，還在後巷地下搵到暗號！呢個站，有人開始除衫、飲水。
宋王臺→（土瓜灣道）→黃埔
落機舖，Alan一眼就完成搵遊戲機主角名Batrider的任務，大叫Easy！
黃埔→（公主道）→京士柏
大家上完樓梯又落斜坡，轉完一圈又一圈，終於發現目標路牌被人刻意用枯草遮住。負責載我的車手David又扭親舊患！有感有人太卑鄙，又太少時間，於是兩隊同行人馬開始交換「心得」，連記者都被安排獨自行上五樓信義會搵料，因冇地圖在手，卻被行人亂點行錯路！於是Tony決定打電話向信義會教友問料，慳慳腳骨力！
京士柏→（3號幹線→長青隧道→北大嶼山公路）→赤鱲角機場
雖然公路猛風無比，新牌仔QWW每個站都落力搵料，因是第一次坐車尾入機場，一落車就開心到叫！因為呢個長途站唔使做任務已經有40分，於是大家去麥記食個包慰勞吓自己，也順便去加油和計劃下幾站行程。
赤鱲角機場→（回程路→青衣北橋）→荃灣
大部份隊員都係第一次到三棟屋，大讚靚！為得分，決定偷偷將展品大頭佛放在頭影相。
荃灣→（城門隧道）→車公廟
去車公廟任務係搵一支籤，但Alan不但買香拜神，重誠心跪低求籤，但之後好唔開心，因為係下籤，唔「老黎」呀！
車公廟→（大老山隧道→東隧→東廊）→杏花邨
呢站好順利，所以大隊有心情停下來擺Pose影相喇！
杏花邨→（東廊）→筲箕灣
繼上次入廟拜神，Alan今次數公廁數目，終於有機會方便方便。
筲箕灣→（大潭道）→赤柱
去赤柱沿途九曲十三彎好刺激，但途經大潭水塘，風景吸引，目的地還有街頭Show、狗展……唉，但唔得閒欣賞，而最擔心是扭親腳的David可唔可以頂落去。
赤柱→淺水灣→（香港仔隧道）→灣仔金紫荊廣場
天暗暗，夠鐘報到了，要縮減行程。但點都行多一個站啦！
Gerund 30多歲 有車牌10多年 駕Majesty250
「自從十年前炒車後，一直改玩四個轆，最近忍唔住玩番電單車，但點都唔會開快，好開心在隊友照應下，突破到心理關口，不知不覺時速過百公里！」
敖先生 44歲 有車牌1年多 駕Majesty250
「好似學生去旅行，動手動腦以為人多有着數，其實人太多，反而行得慢！」慢有慢好，我欣賞到赤柱條路好靚！
金鐘青獅會
綿羊谷
大鷹會