外圍股市呢輪係咁跌，歐洲股市連跌9日，美股杜指8000大關亦失守，但由於已跌到好超賣，市場預料短期會出現反彈，所以噚日港股已冇再跟外圍下跌，恒指低開，落到9237就反彈（前低位9245果然有承接力），之後行情就一路在「正方」爭持，收市9325，升26點，成交不足54億元，期指仍然低水。
大市暫乏方向，國企繼續擔任資金避難所角色，近日調整完成，升浪似有再起之勢。大行同基金一路收集，未有停過，到收集完成之日，就係大升之時，噚日表現最佳嘅係慶鈴（1122），收1.06元，升5仙，升幅5%；鋼鐵股亦好正，鞍鋼（347）、重鋼（1053）同馬鋼（323）都有3%進帳。
兗州煤業（1171）係基金愛股，收3.25元，升1個位。早輪股價升上3.4元後出現調整，噚日由低位3.15元反彈高收，一舉而升破10日、20日線和下降軌阻力，升勢再現，量度上升目標指向3.7元。
去年下半年，市場求過於供，內地煤價穩步上升，而美伊局勢緊張，石油價格高企，也令煤炭需求更為殷切，加上內地整治煤炭行業，對大公司如兗煤等特別有利，預料盈利可保持高增長的勢頭。
02年度，集團收購之鐵路資產可作出全年盈利貢獻，估計盈利可達12.5億元人民幣，上升28.9%，每股盈利0.43元人民幣，PE8倍，息率約3.5厘。
03年度，集團盈利料可上升至14億元人民幣，每股盈利0.48元人民幣，持有1年，股價料可見4字頭。
東江環保（8230）今日上市，由於係配售關係，聽聞貨源都幾集中，大部份落在基金手上，揸長線，消息就話短線可以睇好，小注無妨。
東江主要以深圳為中心的珠三角建立廢料處理能力，每年可處理有機廢料9000噸，無機廢料51000噸，另在惠州、成都及上海有廢料處理廠。今次上市集資，主要提升集團生產設施的處理能力。環保股有概念，東江PE又低，基金重注上車，日後應有作為。
郭兆誠