地產多聲道:二手放盤都有利是派

地產多聲道:二手放盤都有利是派

農曆新年就到,各發展商都加優惠促銷貨尾,重係最實際嘅現金利是㖭,搞到想置業嘅買家等新年至入市,二手市場就真係雪上加霜,點樣同一手盤競爭?鴨脷洲海怡半島業主就一於同發展商對着幹,用埋同一招送現金利是去吸引買家注意。
中原海怡半島分行經理盧鏡豪對蘭西講,公司收到唔少海怡半島業主查詢,話發展商新年送現金利是畀買家,搞到佢哋啲樓冇人吼。
中記就建議啲業主一於送埋一份,用咗一個禮拜同業主聯絡,總共有十二名同意送現金利是畀買家,金額3.88萬,夠好意頭。
呢十二個單位面積由六百幾呎到千幾呎,叫價由百五萬到三百七十餘萬元,其中七個係二百萬以下。盧鏡豪話,買家叫價冇提高到,今次喺年初一至年初十送現金利是呢招,希望可以殺出重圍。

網上發揮睦鄰精神
科技日新月異,以往靠把口傳遞嘅消息,𠵱家可以透過互聯網發放。恒基嘅大角嘴港灣豪庭第一期入伙冇耐,啲業主自發建立咗個網頁(圖二),裏面有好多有用資料,好似入伙同驗樓需知、區內資料等,當然重有討論區,同樓盤嘅相集。
蘭西對掌故一欄較感興趣,從中知道好多嗰區以前嘅歷史。
樓盤業主或者係有興趣人士可登入下列網站www.metroharbourview.com 。
現時好多新入伙嘅屋苑,都會自設網站。發展商可從中了解住客有乜不滿同需要。

何東曾孫貝沙灣教細路
數碼港貝沙灣嘅富豪級會所,介紹到最後兩招嘞。其中一招係喺兒童會所(Kid'sClub),提供富豪子弟級數嘅課餘培訓同活動。搵兒童教育專家編制課程,喺會所裏面設Kid'sGallery。而著名已故慈善家,何東爵士個曾孫,即係何鴻章個仔何浩(圖三),佢太太苗春暉(Joanna)係負責人。由佢哋設計多項藝術課程,發揮小朋友潛能同創意。
另一個就喺EntertainmentClub,有齊超過一百二十種全球國際電視頻道,隨時觀看新聞資訊,重有十六個遊戲平台。電盈又話會送部重未有得賣嘅多媒體HomePAD設備畀住戶,價值逾一萬元,可作無線上網、收發電郵兼電視機、數碼相機等用途。

利記開課迎租管大解放
政府放寬租管計劃同埋租津將出台講咗冇耐,代理已即時有行動。利嘉閣近日搞「租務個案研習及處理方法」課程,請嚟律師行代表講解現行租務條例,代理最容易忽略嘅細節,重有實例個案㖭。
另外,利記下月11號搞周年聚餐,喺九龍灣國際展貿中心擺七十幾圍,重會請發展商同銀行界人士出席。重首次將同事分港九同新界三區,各區都有表演,聽講佢哋每晚收工後就去綵排,可見大家幾投入。據聞利記嘅董事廖偉強會表演一字馬,公司重預備要施永青表演㖭,究竟係乜?到時至知。

黎結貞靠熟客成花魁
樓市成交量逐年萎縮,代理搵食日見艱難,舊年做到topsales嘅經紀,促成宗數唔算好多,好似美聯最猛嗰名,沙田第一城分行黎結貞,都係得103宗。蘭西同佢傾過,原來佢以前喺安居樂做,過檔美記唔係好耐。
黎結貞話做得最多成交嘅屋苑,係沙田第一城,因為呢區做得耐,有一班熟客仔,透過介紹做到唔少生意。佢話做代理最緊要誠實,要介紹好盤畀人,咁啲客第日要買賣物業,都會搵番你!各位行家學嘢啦!
蘭西
電郵地址:[email protected]

(圖二)

(圖三)