我求大俠響禮拜六、日大大話話睇咗成十場波，前晚捱眼瞓諗住睇巴塞個教頭雲高爾點衰啦，估唔到海底撈月，睇見切爾達嘅施雲奴窄角度射入世界波，當堂彈起。呢件巴西兵畀我感覺係：佢有唔差同胞卡洛斯太多嘅質素，之但係冇人哋咁好際遇。
呢位前阿仙奴左路翼衞以前都射入過一啲世界波。我諗重有人記得兩季前佢對車路士彎入球靚波。本來佢響兵工廠踢得唔曳，點知有後起之秀A高爾冒起，同埋聽講佢揸住嘅護照有問題，被迫着草離開英超。邊學似卡洛斯踢完國米再去皇馬咁風光？球員上唔上到位除咗睇實力，有時真係要睇埋運氣。
江山易改，本性難移。話說中國甲B球隊甘肅天馬日前為新加盟的加斯居尼搞咗個記者會，「肥仔嘜」響會上瘋言瘋語，九唔搭八，正當天馬職員向佢做晒表情想暗示佢收口之際，佢重話會帶領天馬球員去英超踢波喎，即刻引起哄堂大笑。最後天馬高層做埋手勢佢至肯收口。好彩呢隻醉貓無當眾耍埋醉拳，如果唔係就更加失禮囉。
上個禮拜國米同羅馬高層話AC米蘭今季未輸過十二碼，有黑幕。話口未完，前日AC就因為一個十二碼輸畀烏甸尼斯，唔知輿論有無影響到球證判決嘞。施多夫都幾識把握機會寸人，賽後話：「𠵱家好多人會心涼啦。」唔止AC失威，拉素刷新唔到十七場連續不敗紀錄。意甲向來視「十七」為不祥號碼，真係咁邪？
巴迪斯圖達前日首次代表國米上陣對安玻里，初步睇佢同韋利合作效果唔錯，賽後唔少人豎起手指公讚佢。不過亦有球評家話列高巴後備上場之後發揮威力，令到韋利多咗空位連中三元，所以我求大俠奉勸「巴迪高」咪老定，正選位係唔係坐定粒六，𠵱家重係言之尚早。
噚日魔術對塞爾特人場波，相信唔少人都好似我求大俠咁，知道獲加唔打得，諗住魔術隊「坐定粒六」。點知臨開波先知，魔術得分王麥基迪嘅未婚妻「蘇得」，所以未有隨隊出征。最慘係香港時間半夜先知呢個消息；之前諗住捉到魔術呢個筍盤嘅下盤客，都咪話唔一殼眼淚。