恒指最低時急跌207點，埋單跌161點，而期指跌135點，少過恒指跌幅，情況唔算太壞。恒指收9298，如果美股定得住，恒指唔使下試9字齊頭或去年10月底位。
恒指最低位時，同上月底相差幾點，中移動（941）最低19.40元，亦同上月底部相差無幾，彈番上19.65元收市。睇多一陣，中移動可能證實見雙底，到時博反彈，揀中移動Call輪埋手。9532同9526愈來愈價外，壽命亦愈來愈短，咪搞呢兩件。9650現價10.3仙，溢價15.4%唔低，但7月至到期，唔使咁快輸溢價，又有槓桿率18.1倍配合，喺中移動Call輪中，係最正路嘅對象。
中電信（728）穩如泰山，喺沙塵滾滾之際，曾經逆市升2仙造1.54元，最後收1.52元，冇跌到。踏入03年，中電信醒好多，唔再潛水，睇盤路，會慢火煎魚式爬上去，而由於size大，每日成交金額用億計，爬升速度唔會好快。
中電信慢慢向上移，最近掛牌嘅Call輪買唔買得過？
答案係買唔過，因為槓桿率唔夠大，而溢價至少嗰件都11.9%，啲溢價會慢慢縮，正股升少少啲輪價都可能下跌。4隻新輪中，一定要揀嘅話，就揀9696。
章盛